Lögreglan á höfuðborgarsvæðinu var kölluð út í gærkvöldi eftir að tilkynnt var um þjófnað úr verslun. Tveir einstaklingar eru grunaðir í málinu og réðust þeir á starfsmann verslunarinnar sem ætlaði að hafa afskipti af þeim. Starfsmaðurinn hlaut minniháttar áverka.

Þetta kemur fram í yfirliti lögreglu yfir verkefni gærkvöldsins og næturinnar. Átti atvikið sér stað í umdæmi lögreglustöðvar 4 sem sinnir verkefnum í Árbæ, Grafarholti, Norðlingaholti og Mosfellsbæ.

Í miðborginni var svo tilkynnt um einstakling reyna að brjótast inn og fylgdi tilkynningunni að hann væri með eggvopn meðferðis. Einstaklingurinn var handtekinn áður en hann komst inn í húsnæðið og við leit á honum fannst leikfangasverð úr plasti í bakpoka.

Þá var tilkynnt um líkamsárás í heimahúsi í umdæmi lögreglustöðvar 3 sem sinnir Kópavogi og Breiðholti. Gerandi var handtekinn á vettvangi og vistaður í fangaklefa vegna rannsóknar málsins. Loks var tilkynnt um æstan einstakling í verslun á sama svæði og var hann búinn að skemma einhverjar vörur í versluninni. Hann hélt sína leið eftir skýrslutöku.