Harry Kane fyrirliði enska landsliðsins og framherj FC Bayern spilaði golf með sjálfum Tiger Woods fyrir nokkrum árum, hann segir það hafa verið ótrúlega upplifun.
Kane var staddur í fríi á Bahamas með góðum vini sínum sem er öflugur kylfingur.
„Ég var á Bahamas og atvinnumaður sem ég þekkti smá sagði mér að hann væri að spila með Tiger síðdegis og hvort ég vildi koma með,“ sagði Kane.
„Þetta var eitt af þeim ótrúlegu augnablikum, ég sagði já um leið.“
Kane sagði svo frá því hvernig hringurinn gekk. „VIð fórum á fyrsta teig og ég átti flott upphafshögg, Tiger labbaði en ég var á bíl. Við töluðum ekki mikið saman til að byrja með en síðan ræddum við allt.“
„Hann bað mig um að spila með sér 18 holur aftur næsta dag. Þetta var magnað, ég spilaði ekki vel en Tiger var á sex undir. Ég vissi á undan öllum að hann væri að koma til baka eftir meiðsli.“
Kane sjálfur er góður kylfingur og er með 3,7 í forgjöf.