Formaður samninganefndar sveitarfélaga, Inga Rún Ólafsdóttir, telur ólíklegt að samningar náist í viðræðum við kennara fyrir næsta þriðjudag en þá hefst boðað verkfall kennara.
Þetta kemur fram á RÚV. Fundur í deilunni er boðaður núna fyrir hádegi og er stefnt á langan fund.
Kennarar gera kröfr um rúma milljón í grunnlaun á mánuði og sé það í samræmi við meðallaun sérfræðinga á opinberum markaði. Segir Inga Rún að erfitt sé að verða við þeirri kröfu því mikill munur sé á réttindum opinberra starfsmanna og starfsmanna á almennum vinnumarkaði.
„Réttindi opinberra starfsmanna eru miklu meiri heldur fólks á almennum vinnumarkaði, menn eiga miklu meiri veikindarétt, lengri orlofsrétt, og kennarar hafa miklu meiri yfirráð yfir sínum vinnutíma heldur en sérfræðingar á almennum vinnumarkaði,“ sagði Inga Rún í viðtali í Morgunútvarpinu á Rás 2 í morgun og er það haft eftir henni í netfrétt RÚV.
Meðallaun grunnskólakennara eru rúmlega 700 þúsund krónur í dag.
Verkföll eru boðuð í níu skólum 29. október, tíundi skólinn bætist við 11. nóvember og sá ellefti þann 25. nóvember.