Unnið er að sótthreinsun húsnæðis leikskólans Mánagarðs í kjölfar þess að þar greindust fjögur börn með E.coli sýkingu. Leikskólanum hefur nú verið lokað tímabundið.
Soffía Emelía Bragadóttir, leikskólastjóri Mánagarðs, segir í yfirlýsingu til fjölmiðla að málið sé litið mjög alvarlegum augum. Tilkynningin er eftirfarandi:
„Seinnipart þriðjudagsins 22. október greindist barn af leikskólanum Mánagarði með E.coli sýkingu. Í kjölfarið hafa þrjú önnur börn greinst með sýkinguna. Í samráði við sóttvarnayfirvöld var tekin ákvörðun um að loka leikskólanum tímabundið og unnið er nú að rannsókn málsins og sótthreinsun húsnæðisins.
Sóttvarnalæknir hefur sett á sérstakan stýrihóp sem tekur að sér að rekja m.a. uppruna sýkingarinnar ásamt því að veita hagaðilum upplýsingar um möguleg einkenni og meðgöngutíma og fyrirmælum um hvernig bregðast skuli við ef grunur leikur á smiti. Voru allir foreldrar upplýstir um málið í gærkvöldi og hlutu þau einnig leiðbeiningar frá Sóttvarnalækni. Eru foreldrar hvattir til að kynna sér vel leiðbeiningar Sóttvarnalæknis um e.coli sýkingar og fylgjast vel með líðan barna sinna.
Beðið er eftir upplýsingum frá talsmanni stýrihóps Sóttvarnalæknis en FS hefur nú þegar hafið yfirferð og endurskoðun á öllum ferlum innan leikskólans sem snúa að hreinlæti, matvælum og meðferð þeirra.
Málið er litið mjög alvarlegum augum. Hugur okkar er fyrst og fremst hjá börnum Mánagarðs og foreldrum þeirra. Við munum veita foreldrum og öðrum hagaðilum reglulegar uppfærslur um gang mála og í samstarfi við Sóttvarnarlækni, Heilbrigðiseftirlitið og aðra viðeigandi aðila.“