Stanley Druckenmiller, einn farsælasti fjárfestir sögunnar, segir að ýmislegt bendi til þess að úrslitin í bandarísku forsetakosningunum séu ráðin. Druckenmiller er einn ríkasti maður Bandaríkjanna og eru eigur hans metnar á um tíu milljarða Bandaríkjadala.

Í viðtali við Bloomberg sagði fjárfestirinn að margt benti til þess að Donald Trump yrði næsti forseti Bandaríkjanna.

„Ég verð að segja, ef við lítum á síðustu tólf daga, þá virðist markaðurinn vera sannfærður um að Trump muni vinna. Maður sér það á hlutabréfum í bönkum, rafmynt og meira að segja á DJT, samfélagsmiðlafyrirtæki hans,“ sagði Druckenmiller.

„Þannig að ef þú myndir setja byssu upp við höfuðið á mér myndi ég segja að Trump sé líklegastur til að vinna kosningarnar.“

Druckenmiller benti á að skoðanakannanir gæfu ekki alltaf rétta mynd af stöðu mála og það væri eitt af þeim sem hefði breyst í gegnum árin.

„Það svarar enginn þessum könnunum lengur,“ sagði hann og benti á að fyrirtækin sem framkvæma skoðanakannanir geti aðeins lagt mat á svör þeirra sem taka upp símann – og þeim fari fækkandi. Það geri það að verkum að erfitt er að fá svarendur til að endurspegla með nákvæmum hætti þá sem ganga svo að kosningaborðinu.

Hann segir að hlutabréfaverð og verð á Bitcoin hafi farið hækkandi undanfarna daga og það bendi til þess að markaðurinn telji að Trump muni vinna. Þessu væri öfugt farið ef markaðurinn teldi að Kamala Harris væri líklegur sigurvegari.

Druckenmiller hefur sjálfur gefið það út að hann muni hvorki kjósa Donald Trump né Kamölu Harris í komandi kosningum.