Myndir, sem voru teknar með myndavélum Marsbílsins Curiosity, sýna mörg stór göt á einu dekki hans. En skemmdirnar virðast ekki hægja neitt á ferð bílsins.

Live Science skýrir frá þessu og bendir á að myndirnar sýni hvaða toll það tekur að aka um yfirborð Mars í 12 ár.

Curiosity lenti á Mars þann 5. ágúst 2012 og var reiknað með að bíllinn yrði nothæfur í eitt til tvö ár. En það er svo sannarlega hægt að segja að hann hafi gert gott betur en það því hann hefur nú verið á ferðinni í 12 ár. Á þessum árum hefur hann lagt 32 kílómetra að baki og hefur eingöngu haldið sig í Gale gígnum þar sem hann lenti.

Vísindamenn hafa notað bílinn til að rannsaka skýin á Mars, leitað að ummerkjum um líf og fylgst með fjarhlið sólarinnar. Bíllinn hefur séð margt skrýtið á Mars, þar á meðal stein sem líkist bók, steinblóm, Star Trek merki og dularfullar „geimdyr“.