Metro segir að kviknað hafi í pakka í vöruhúsi DHL í Minworth í Birmingham þann 22. júlí. Pakkinn hafði komið þangað með flugi. Eldurinn er sagður hafa verið svo mikill að ef hann hefði komið upp í flugvél hefði hann getað valdið miklu tjóni á henni.
Enginn meiddist í eldsvoðanum í Minsworth og náðu starfsmenn og slökkviliðsmenn að slökkva hann.
DHL segir að pakkinn hafi verið sendur frá Litháen.
Eldsvoðinn vakti ákveðnar grunsemdir þegar fréttist að nánast samskonar atburður hefði átt sér stað í vöruhúsi DHL í Leipzig í Þýskalandi. Þar kom eldurinn upp í pakka skömmu áður en setja átti hann um borð í flugvél. Það vildi til að brottför vélarinnar seinkaði og því kom eldurinn upp áður en vélin fór í loftið. Ef hún hefði farið á loft á réttum tíma hefði eldurinn kviknað þegar hún var á flugi og hún „hefði hrapað“ sagði Thomas Haldenwant, forstjóri þýsku leyniþjónustunnar, við þingnefnd í síðustu viku.
Ken Mcallum, forstjóri bresku leyniþjónustunnar MI5, sagði nýlega að rússneskar leyniþjónustustofnanir væru að reyna að valda óróleika í Bretlandi og Evrópu. Nú þegar hafi íkveikjur, skemmdarverk og fleira verið framið.
Í mars kviknaði í vörugeymslu í Lundúnum en hún er í eigu fyrirtækis sem tengist Úkraínu. Grunur leikur á að kveikt hafi verið í henni. Sjö menn liggja undir grun um að hafa kveikt í húsinu og eru þeir allir taldir hafa tengsl við Rússland.
Eldur kom upp í verslunarmiðstöð í Varsjá í Póllandi í maí og sagði Donald Tusk, forsætisráðherra Póllands, þá að „mjög líklega“ hefðu rússneskir skemmdarverkamenn verið að verki.
Alvarlegasta málið fram að þessu er þó líklega fyrirætlun Rússa um að myrða Armin Papperger, forstjóra þýska vopnaframleiðandans Rheinmetall. Bandarískar leyniþjónustustofnanir gripu inn í fyrirætlanir Rússa í júlí.