Karl Bretakonungur er í opinberri heimsókn í Ástralíu. Hann var mættur í þinghúsið til að ávarpa gesti þegar þingkona af áströlskum frumbyggjaættun, Lidia Thorpe, öskraði á hann. Thorpe öskraði í um mínútu áður en öryggisverðir fylgdu henni út. Hún sakaði konunginn um þjóðarmorð gegn áströlskum frumbyggjum og sagði svo: „Þetta er ekki landið þitt og þú ert ekki minn konungur.“

Öldungur af frumbyggjaættum, Aunty Violet Sheridan, hafði áður boðið konunginn velkominn og hún sagði Thorpe ekki tala fyrir alla frumbyggja og framkoma hennar væri til skammar. „Konungurinn er ekki heill heilsu. Hann er að gangast undir krabbameinsmeðferð og þurfti ekki á þessari uppákomu að halda. Ég kann að meta að fá hann hingað í það sem gæti verið hans síðasta heimsókn. Margir eru sammála mér hvað þetta varðar.“

Eftir þessa uppákomu gekk heimsókn Karls til þingsins áfallalaust fyrir sig. Thorpe sagði þó við fjölmiðla að hún hafi ætlað sér að senda konungnum skýr skilaboð. „Til að vera þjóðhöfðingi þá þarftu að vera af þjóðinni kominn. Hann kemur ekki héðan.“

Thorpe er sjálfstæður þingmaður frá Victoria og hún hefur barist fyrir því að ástralska ríkisstjórnin geri sáttmála við frumbyggja landsins. Enginn slíkur sáttmáli hefur verið gerður og hafa margir frumbyggjar bent á að þeir hafi aldrei samþykkt að framselja bresku krúnunni fullveldi sitt. Thorpe kallaði eftir því að Karl beitti sér fyrir slíkum sáttmála, en frumbyggjar muni aldrei beygja sig að fullu undir vald nýlenduherra. Hún hefur eins bent á að forfeður Karls hafi staðið fyrir fjölda- og þjóðmorði gegn frumbyggjum.

Ástralía er hluti af breska samveldinu. Þau hafa sína eigin ríkisstjórn en Karl konungur er þó þjóðhöfðingi þeirra. Áratugum saman hafa Ástralar deilt um stöðu sína undir bresku krúnunni. Árið 1999 fór fram þjóðaratkvæðisgreiðsla þar sem Ástralir fengu að taka afstöðu og höfnuðu því að verða sjálfstætt ríki.