Um þetta leyti fyrir fjórum árum var ekkert sem benti til annars en að Brooklinn Khoury ætti bjarta framtíð fyrir höndum. Þessi tvítuga stúlka hafði getið sér gott orð sem fyrirsæta og hafði meðal annars setið fyrir í Vogue og var einnig öflug á hjólabretti.

Allt breyttist þetta í nóvember 2020 þegar hundur réðst á hana og beit af henni efri vörina.

Brooklinn var í heimsókn hjá frændfólki sínu í Arizona þegar atvikið varð og var hundurinn, sem var af tegundinni pit bull, í eigu frænda hennar. Brooklinn hafði oft hitt hundinn og enn þann dag í dag hefur hún ekki hugmynd um hvað varð til þess að hann réðst á hana.

Hún var í viðtali við CBS nýlega þar sem hún ræddi atvikið.

Í viðtalinu rifjar hún upp þegar hundurinn stökk á hana með opinn kjaftinn og hún man greinilega eftir því að hafa séð eitthvað detta úr kjafti hans og á gólfið. „Ég áttaði mig ekki á því þá en þetta var efri vörin á mér,“ segir hún.

Var það ekki fyrr en hún dró fram símann sinn og opnaði myndavélina að hún sé hversu alvarleg meiðslin voru. Hún var flutt á sjúkrahús og vonaðist hún til þess að hægt yrði að sauma efri vörina aftur á. Það gekk því miður ekki og hefur Brooklinn þurft að gangast undir nokkrar lýtaaðgerðir á síðustu árum sem hafa kostað tugi milljóna króna.

Brooklinn segir að þó meiðslin hafi verið slæm og haft gríðarleg áhrif á útlit hennar og líf þá hafi aldrei neitt annað komið til greina en vera opinská með það. „Ég vildi deila minni sögu,“ segir hún og hefur hún leyft fylgjendum sínum á samfélagsmiðlum að fylgjast með bataferlinu.

Óhætt er að segja að læknum hafi tekist vel til við að græða sárin eins og myndin hér að neðan ber með sér.