Viðar Örn Kjartansson framherji KA í Bestu deild karla hefur verið dæmdur í tímabundið keppnisbann. Það er FIFA sem setur Viðar í bann vegna þess að hann hefur ekki staðið skil á uppgjöri við búlgarska liðið, CSKA 1948 Sofia.

Haukur Hinriksson, lögfræðingur KSÍ staðfestir þetta í samtali við 433.is.

Viðar var ekki í leikmannahópi KA sem vann sigur á Vestra í Bestu deild karla í gær, hefur FIFA sett Viðar í sex mánaða bann frá öllum knattspyrnuleikjum.

Í samtali við 433.is segir Haukur að við starfslok Viðars hjá CSKA 1948 Sofia hafi hann og félagið samið um ákveðnar skyldur Viðars gagnvart CSKA. Eftir að hafa ekki efnt sinn hluta starfslokasamnings hafi CSKA farið með málið til FIFA . FIFA hafi kveðið upp úrskurð í málinu sem hafi fallið CSKA í vil. Hefur Viðar því núna verið úrskurðaður í tímabundið leikbann í öllum opinberum leikjum þangað til hann geri upp skuldbindingar sínar gagnvart CSKA. Bannið getur varað í að hámarki 6 mánuði.

Viðar sjálfur segir í samtali við 433.is að hann hafi borgað hluta af þessari fjárhæð, málið hafi komið flatt upp á hann því hann hafi talið að ekki ætti að klára að gera málið upp á þessu ári.

Viðar getur hins vegar aflétt banninu strax með því að ganga frá greiðslunni sem FIFA hefur úrskurðað um að CSKA 1948 Sofia eigi rétt á frá framherjanum. Málið tengist KA ekki á nokkurn hátt.

Borgi Viðar ekki upphæðina á þessum sex mánuðum er FIFA með úrræði til að dæma Viðar aftur í bann en óvíst er hvort farið yrði í slíkar aðgerðir.

Viðar samdi um starfslok við búlgarska liðið í upphafi árs og kom heim til Íslands. Eftir erfiða byrjun hjá KA hafði hann verið að ná flugi nú þegar hann hefur verið settur í bann.

Viðar Örn er 34 ára gamall en hann hefur átt magnaðan feril sem leikmaður, hann á að baki 34 A-landsleiki fyrir Ísland en samningur hans við KA rennur út eftir tímabilið.