Breski tónlistarmaðurinn Liam Payne er látinn, 31 árs að aldri.
Bandarískir og argentískir fjölmiðlar greina frá. Payne var staddur á hóteli í Buenos Aires og greina nokkur vitni frá því að hafa séð hann falla af svölum hótelherbergis síns á 3. hæð. Ekki er vitað hvort um slys var að ræða eða Payne hafi tekið eigið líf.
Atvikið átti sér stað kl. 17 að staðartíma. Vitni segja að Payne hafi verið hagað sér undarlega fyrr um daginn, brotið fartölvu sína og verið fylgt upp á hótelherbergi sitt.
Payne var aðeins 16 ára gamall þegar hann varð einn meðlima strákasveitarinnar One Direction ásamt Harry Styles, Zayn Malik, Niall Horan og Louis Tomlinson. Hljómsveitin var sett saman árið 2010 í sjónvarpsþáttunum X-factor og náði fljótlega miklum vinsældum um allan heim. Malik hætti í One Direction árið 2015, en hinir störfuðu saman til ársloka það ár.
Payne opnaði sig um glímu sína with áfengi og lyf þegar hann var á tónleikaferðalagi með One Direction. Sagði hann að ástandið hefði orðið svo svart um tíma að hann hefði átt við sjálfsvígshugsanir að stríða.
Payne gaf út sólóplötuna LP1 árið 2019 og nú í mars gaf hann út plötuna Teardrops.
Hann á son fæddan árið 2017 með Cheryl Cole, sem var í kvennasveitinni Girls Aloud.
Ef einstaklingar glíma við sjálfsvígshugsanir er bent á Hjálparsíma Rauða krossins 1717 og netspjall Rauða krossins 1717.is. Opið allan sólarhringinn. Einnig má hafa samband við Píeta-samtökin sem veita ókeypis ráðgjöf í síma 552-2218, allan sólarhringinn. Netspjall Heilsuveru þar sem svarar hjúkrunarfræðingur er líka opið frá kl.8-22 alla daga. Fyrir þau sem misst hafa ástvin í sjálfsvígi má fá stuðning í sorg hjá Sorgarmiðstöð og hjá Pieta samtökunum.
