Það tók Vladimír Pútín Rússlandsforseta ekki langan tíma að átta sig á því eftir að Úkraínustríðið hófst að hann væri að missa hermenn í hratt enda mótspyrnan mikil frá andstæðingnum. 

Til að koma til móts við skort á hermönnum var gripið til þess ráðs að leyfa dæmdum glæpamönnum, forhertum morðingjum þar á meðal, að slást í lið með hernum og berjast í Úkraínu gegn því að fá dómana stytta. Nú hafa margir þessara glæpamanna lokið eins árs herþjónustu sinni og geta því um frjálst höfuð strokið.

Ekki eru allir sáttir við þetta og eru íbúar á sumum stöðum reiðir vegna þess að nú geta dæmdir ofbeldismenn og morðingjar gengið óáreittir um göturnar.

Í frétt V1.ru, sem Daily Star vitnar til, kemur fram að einn þessara manna sé Dmitry Malyshev sem er fluttur aftur heim í þorpið Rakhinsky í Volgograd. Árið 2014 var hann dæmdur í 25 ára fangelsi fyrir að myrða vin sinn, elda líkamsleifar hans og borða þær. Allt þetta sýndi hann svo í beinni útsendingu á samfélagsmiðlum.

Annar ofbeldismaður, Alexander Maslennikov, var dæmdur í 23 ára fangelsi fyrir hrottafengin morð á tveimur stúlkum í Volzhsky árið 2017. Eins og Dmitry hefur Alexander lokið eins árs herþjónustu sinni og er því frjáls maður í dag.

Fleiri eru taldir upp í upptalningu V1.ru. Þar á meðal er Nikolai Ogolobya sem var dæmdur í 20 ára fangelsi árið 2010 fyrir morð og mannát. Hann sneri nýlega aftur í heimahaga sína í Yaroslavl. Þá er Denis Gorin frjáls eftir að hann var dæmdur í tíu ára fangelsi fyrir nokkur morð og mannát árið 2003. Þremur árum eftir að honum var sleppt myrti hann aftur og var dæmdur í 23 ára fangelsi. Eftir aðeins nokkurra ára afplánun fékk hann að ganga í herinn til að berjast í Úkraínu og er hann nú frjáls.

Rússneskir fjölmiðlar segja að talsverð ólga og óánægja ríki meðal íbúa á svæðum þar sem morðingjarnir eru nú búsettir á.