Tónlistarkonan og baráttukonan Margrét Kristín Blöndal, eða Magga Stína, lét Einar Kárason og Egil Helgason heyra það í umræðum á samfélagsmiðlum. Einar hafði hafið umræðu um rétttrúnað og notkun á orðinu þjóð.
„Mikið rosalega er rétttrúnaðurinn búinn að toga það fólk út í móa sem ekki má lengur heyra minnst á þjóð,“ sagði rithöfundurinn og fyrrverandi varaþingmaðurinn Einar Kárason í færslu á samfélagsmiðlum.
Ástæða færslunnar er vafalaust umræða sem sprottið hefur upp um nýtt slagorð Samfylkingarinnar, sem Einar sat fyrir á þingi. Slagorðið er „Sterk velferð, stolt þjóð.“
Sumt fólk hefur lýst óánægju með þetta slagorð. Meðal annars Inga Björk Margrétar Bjarnadóttir sem sagði af sér varaþingmennsku fyrir flokkinn vegna stefnu í útlendingamálum. Borgarfulltrúinn Sabine Leskkopf, sem hefur gagnrýnt stefnuna í útlendingamálum, hefur einnig spurt spurninga um þetta slagorð.
Hafa heilmiklar umræður spunnist við færslu Einars þó stutt sé. Á meðal þeirra sem leggja orð í belg er fjölmiðlamaðurinn Egill Helgason.
„Einmitt. En það vill samt þjóðareign og þjóðlendur og þjóðfundi o.s.frv,“ segir hann um þá sem segjast nú ekki vilja heyra á þjóð minnst.
Þá hefur tónlistarmaðurinn Bubbi Morthens lýst ánægju með notkunina. „Þjóð er fallegt orð,“ sagði hann.
Aðrir setja spurningarmerki við. Til dæmis Grímur Atlason, framkvæmdastjóri Geðhjálpar og eiginmaður Helgu Völu Helgadóttur, fyrrverandi þingmanns Samfylkingarinnar.
„Þetta snýst um stemmingu og hvert skal haldið. Þegar SDG [Sigmundur Davíð Gunnlaugsson] hrósar Samfylkingunni fyrir stefnu í útlendingamálum, alþjóðasinnuðu áherslurnar eru settar á ís, sjávarútvegsmál sett í sátt útfrá skilyrðum útgerðarinnar og slagorðið Stolt þjóð – þá er mjög eðlilegt að fólk undrist. Réttrúnaður?“ spyr hann.
Einnig Vilhjálmur Þorsteinsson, fjárfestir, sem bendir á að orðabókarskilgreiningin á orðinu þjóð sé hópur fólks sem myndi eina heild, eigi sameiginlegt tungumál, menningu, sögu og búi yfirleitt á samfelldu landsvæði.
„Ég hef ekki nokkurn skapaðan hlut á móti því að fólk noti orðið í þessari merkingu,“ segir Vilhjálmur. „En það er pínu skrýtið þegar alþjóðasinnaður jafnaðarflokkur, sem hefur til þessa lagt áherslu á inngildingu og fjölmenningu, kýs að nota hugtakið „stolt þjóð“ sem slagorð í kosningum.“ Spyr hann hvort að til dæmis fólk af pólskum uppruna sem býr hér tilheyri þjóðinni. Betra hefði verið að nota orðið samfélag en þjóð í slagorðinu.
Lengst gekk þó áðurnefnd Magga Stína, sem beinlínis hellti sér yfir Einar og Egil í athugasemd.
„„Það má bara ekkert lengur!““ Ef það er eitthvað sem er ógeðfelldara en hreinn og klár fasisti þá er það heimskuleg diplómasíufroða í yfirburðahyggjuköllum, launrasistum eins og ykkur Einar Kárason og Egill Helgason sem fleytið kellingar á kerfinu og viðbjóðslegum kratismanum frá morgni til kvölds,“ sagði hún. „Sú allsherjar afhjúpun sem nú á sér stað á spillingarkerfum heimsins, sniðgengur ykkur sko ekki, öðru nær!“
Ekki er annað að sjá en að þessi eldræða hafi komið flatt upp á Einar og Egil.
„Magga Stína er ekki allt í lagi mín kæra? Voða munnsöfnuður er þetta,“ spurði Egill en á þessum tímapunkti hefur ekkert svar borist.
Einar brást við með því að skrifa aðra færslu, sérstaklega um athugasemd Möggu Stínu.
„Ég var með status um að ef ekki mætti tala um Þjóð, þá væri rétttrúnaðurinn orðinn undarlegur. Fyrir það komment fékk ég eftirfarandi frá Möggu Stínu (veit ekki hvað Egill Helga gerði, lækaði kannski?) En þetta verður æ fyndnara,“ sagði Einar og endurbirti athugasemd hennar.
Greip þá Egill til latínunnar og sagði „Ira furor brevis est [Reiði er skammvinn] – ég er samt ekki viss um að svo sé í öllum tilvikum, hjá sumum virðist reiðin vera viðverandi ástand,“ sagði hann.
