Það var þann 31. janúar 2002 að Robert mætti með dóttur sína á sjúkrahús í bænum Palestine í Texas. Stúlkan var meðvitundarlaus, blá og augljóslega í mikilli lífshættu.
Læknar hringdu nær umsvifalaust á lögreglu og sögðust fullvissir um að stúlkan væri með það sem kallast Shaken baby syndrome. Nikki lést á sjúkrahúsinu daginn eftir og töldu læknar fullvíst að hún hefði verið hrist til dauða – og það áður en krufning hafði farið fram.
„Það voru bara þessi þrjú orð: Shaken baby syndrome. Án þeirra væri hann frjáls maður í dag“
Shaken baby syndrome er umdeilt hugtak í læknavísindum og hafa dómstólar, til dæmis í New Jersey í Bandaríkjunum, afskrifað hugtakið sem „ruslvísindi“ í ákveðnum tilfellum. Það kom þó ekki í veg fyrir að Robert var dæmdur til dauða í febrúar 2003.
Robert hefur staðfastlega haldið fram sakleysi sínu í málinu og aldrei viðurkennt að hafa beitt dóttur sína ofbeldi. Margir virðast vera sammála honum og í þeim hópi er til dæmis lögfræðingurinn og rithöfundurinn John Grisham. Læknar, lögfræðingar og vísindamenn eru einnig í þessum hópi.
Í pistli sem Grisham skrifaði í Washington Post þar sem hann segir að lungnabólga hafi að líkindum dregið stúlkuna til dauða. Rannsóknarlögreglumaðurinn sem rannsakaði málið á sínum tíma er einnig þeirrar skoðunar að sleppa ætti Robert úr haldi sem og fjöldi þingmanna í Texas. „En þeir sem hafa valdið til að stöðva aftökuna virðast ekki vera að fylgjast með,“ segir Grisham í grein sinni.
Á þessum tímapunkti geta aðeins ríkisstjórinn Greg Abbott, áfrýjunardómstóll eða Hæstiréttur Bandaríkjanna stöðvað aftökuna. Ef það gerist ekki verður Robert að óbreyttu tekinn af lífi annað kvöld. „Erum við tilbúin að horfa á aftöku á hugsanlega saklausum manni í stað þess að kafa dýpra í mál hans,“ spyr Grisham.
