Athygli vakti að í Morgunblaðinu í morgun lýsti Þórdís Kolbrún Reykfjörð Gylfadóttir, utanríkisráðherra, varaformaður Sjálfstæðisflokksins og oddviti flokksins í Norðvesturkjördæmi, því yfir að hún íhugi alvarlega að bjóða sig fram í Suðvesturkjördæmi í komandi þingkosningum.
Orðið á götunni er að Þórdís Kolbrún standi frammi fyrir djúpstæðum vanda hvað framboðsmál varðar. Hún þykir lítt hafa sinnt kjördæmi sínu á þessu kjörtímabili og talað er um að hún hafi varla sést þar á ferð, hvað þá meira.
Þá þykir Skagamönnum þeir hafa orðið illilega fyrir því sem gjarnan er lýst sem stórkostlegum dómgreindarbresti þegar Þórdís Kolbrún ákvað að loka sendiráði Íslands í Rússlandi og takmarka mjög umsvif sendiráðs Rússlands hér á landi. Ísland var eina ríkið sem lokaði sendiráði sínu í Moskvu vegna innrásar Pútíns í Úkraínu. Rússar tóku því illa og Skagamenn kenna þessu frumhlaupi Þórdísar Kolbrúnar um að Skaginn 3X, sem var með mikla starfsemi í Rússlandi, lenti í gríðarlegum rekstrarerfiðleikum og var að lokum tekinn til gjaldþrotaskipta fyrr á þessu ári. Skaginn 3X var einn stærsti og blómlegasti vinnustaðurinn á Akranesi, gamla heimabæ Þórdísar Kolbrúnar.
Orðið á götunni er að uppstillinganefnd Sjálfstæðisflokksins í Norðvesturkjördæmi hefði án efa stillt henni upp að nýju sem oddvita listans þar en að við hafi blasað að listi flokksins, með varaformanninn í broddi fylkingar, myndi hljóta afleita kosningu, mun verri en annars staðar á landinu. Slík útkoma myndi án efa skaða mjög möguleika Þórdísar Kolbrúnar á að taka við formennsku, en búast má við því að nýr formaður Sjálfstæðisflokksins verði kosinn á landsfundi í febrúar.
Orðið á götunni er að hugmyndin um framboð Þórdísar Kolbrúnar í Kraganum sé ekki ný af nálinni. Vitað er að Bjarni Benediktsson hefur horft til hennar sem arftaka síns á formannsstóli. Ætlunin hafi verið að Bjarni Benediktsson, forsætisráðherrann sjálfur, myndi leiða hana til hásætis í flokknum á landsfundinum í febrúar og hún myndi síðan, sem nýr formaður, taka sæti Bjarna sem oddviti flokksins í kjördæmi hans.
Nú hefur atburðarásin hins vegar snúist á hvolf og kosið verður til þings fyrst og síðan kemur landsfundurinn. Orðið á götunni er að nú sé ætlunin að Bjarni leiði listann í Kraganum en hætti síðan í stjórnmálum snemma á næsta ári. Þórdís Kolbrún ætli sér 2. sætið á eftir Bjarna og þegar hann segi af sér þingmennsku muni hún færast upp í oddvitasætið.
Sá er galli á gjöf Njarðar að fyrir er í 2. sætinu Jón Gunnarsson sem ætlar ekki að gefa frá sér sætið. Líklega hefur Bjarni afl til að tryggja Þórdísi Kolbrúnu sætið í uppstillingu sem fram fer um helgina en ólíklegt er að Jón og Bryndís Haraldsdóttir og Óli Björn Kárason, hinir þingmenn flokksins í Kraganum, sætti sig þegjandi við það, enda ljóst að líklegt er að 4. sætið er í mikilli hættu og jafnvel hið þriðja, verði úrslitin mjög slæm fyrir Sjálfstæðisflokkinn.
Orðið á götunni er að andstæðingar Sjálfstæðisflokksins í bæði Suðvestur- og Norðvesturkjördæmi njóti þess að fylgjast með vandræðagangi flokksins þessa dagana.
