Bjarne er af mörgum talinn einn áhrifamesti listamaður Noregs frá því að Edvard Munch var og hét, en Bjarne hefur getið sér gott orð fyrir bæði málaralist sína og skúlptúrgerð.
New York Times birti í gær ítarlegt viðtal við Bjarne en í því kemur fram að hann hafi nú stefnt tveimur fjárfestum, Svein Roar Grande og Stein Lie, vegna samnings sem hann skrifaði undir fyrir nokkrum árum.
Í samkomulaginu fólst að Svein og Stein fengu nær allan réttinn af listaverkum og listsköpun Bjarne gegn því að skuld hans við þá upp á fleiri hundruð milljónir króna félli niður.
Svein og Stein eru sagðir hafa lánað listamanninum sem nemur um einum og hálfum milljarði á árunum 2008 til 2020. Þetta voru peningar sem Bjarne gat illa greitt til baka og fór svo að hann skrifaði undir samning um að hann myndi afsala sér réttinum af eigin verkum gegn því að skuldin félli niður.
Bjarne vill nú að samningurinn verði felldur úr gildi og segist hann hafa verið drukkinn þegar hann skrifaði undir hann. „Ef þú myndir sjá þennan samning sem ég skrifaði undir myndirðu átta þig á því að engin manneskja með heilu viti myndi skrifa undir hann. Ég rústaði lífi mínu,“ segir hann í viðtalinu við New York Times. Hann viðurkennir að hafa átt við drykkjuvanda að stríða en er nú giftur og vill helst af öllu fá að halda áfram með líf sitt og listsköpun.
Í umfjöllun Times er einnig rætt við þá Svein og Stein og segja þeir að Bjarne hafi farið afar illa með það fjármagn sem honum var lánað og hann sé núna að reyna að koma sér undan samningnum og um leið að reyna að koma sér undan skuldunum.
Málið er nú fyrir norskum dómstólum og er niðurstöðu að vænta á næstunni.
