Í Landsrétti var kveðinn upp fyrr í dag gæsluvarðhaldsúrskurður yfir manni sem til stendur að framselja til Slóvakíu vegna dóms sem hann hlaut þar í landi. Landsréttur staðfesti úrskurð Héraðsdóms Reykjavíkur í málinu en í þeim úrskurði vekur sérstaka athygli að í röksemdafærslu embætti lögreglustjórans á höfuðborgarsvæðinu, fyrir nauðsyn þess að úrskurða manninn í gæsluvarðhald, er sérstaklega tekið fram að auðvelt sé fyrir eftirlýsta menn að leynast á Íslandi.
Mál mannsins er ekki reifað ítarlega í úrskurðinum, sem kveðinn var upp í dag, en þess í stað vísað í fyrri úrskurð í málinu en Landsréttur staðfesti 10. október síðastliðinn fyrri úrskurð Héraðsdóms um að fallist yrði á að framselja manninn til Slóvakíu.
Í báðum úrskurðum kemur fram að fyrir liggi beiðni frá yfirvöldum í Slóvakíu um að fá manninn framseldan á grundvelli evrópskrar handtökuskipunar sem gefin var út í ágúst 2020. Maðurinn hlaut 13 mánaða fangelsisdóm þar í landi árið 2018.
Maðurinn var handtekinn hér á landi í ágúst síðastliðnum. Hann mótmælti framsalskröfunni og sagðist hafa talið að refsingin sem hann hlaut í Slóvakíu væri fyrnd. Tjáði maðurinn lögreglunni að hann væri einstæðingur og atvinnulaus en hann hefði upphaflega flutt til Íslands til að bæta líf sitt. Í september síðastliðnum féllst ríkissaksóknari á að maðurinn yrði framseldur til Slóvakíu.
Í andmælum sínum við framsalsbeiðninni fullyrti maðurinn að hann hefði ekki verið í felum hér á landi og hefði verið með sama heimilisfang síðan 2020. Hann fullyrti að hann hefði ekkert frétt neitt af dómsmálinu í Slóvakíu og ekki fengið að vita hvenær hann ætti að hefja afplánun. Það væri ómannúðlegt að flytja hann til Slóvakíu þar sem hann ætti við heilsubrest að stríða og hefði átt erfitt líf. Maðurinn vísaði einnig til fyrri atvinnuþátttöku sinnar á Íslandi en hann er eins og áður kom fram atvinnulaus um þessar mundir.
Héraðsdómur Reykjavíkur og í kjölfarið Landsréttur féllust á framsal mannsins. Daginn eftir að Landsréttur staðfesti framsalið, 11. október síðastliðinn, var maðurinn úrskurðaður í gæsluvarðhald í héraðsdómi og Landsréttur staðfesti þann úrskurð fyrr í dag.
Það var embætti lögreglustjórans á höfuðborgarsvæðinu sem fór fram á gæsluvarðhaldið. Í röksemdafærslu embættisins fyrir héraðsdómi segir meðal annars að maðurinn sé slóvakískur ríkisborgari, hafi engin fjölskyldutengsl hér á landi og sé atvinnulaus. Þá liggi fyrir að hann hafi frá upphafi mótmælt framsalinu. Þar af leiðandi sé veruleg hætta á að hann flýi sem hafi oft gerst í sambærilegum málum og auðvelt sé fyrir eftirlýsta menn að fela sig hér á landi:
„Þannig telur lögregla verulega flóttahættu vera fyrir hendi. Þetta mat lögreglu styðst m.a. við reynslu hennar í öðrum sambærilegum málum, enda auðvelt fyrir eftirlýstan mann að leynast hér á landi og koma sér þannig undan afhendingu, en þess eru ítrekuð dæmi í sambærilegum málum. Þar að auki er talin mikil hætta á því að hinn eftirlýsti reyni að komast úr landi í sama tilgangi þar sem lítil sem engin landamæragæsla er á innri landmærum Schengen-svæðisins, enda beinlínis markmið Schengen-samstarfsins að afnema persónubundið eftirlit á innri landamærum, segir í rökssemdafærslu embættisins.“
Ekki var gerð nánari hrein fyrir því í röksemdafærslunni hversu auðvelt það sé fyrir eftirlýsta menn að leynast á Íslandi.
Maðurinn var úrskurðaður í gæsluvarðhald fram til 20. október næstkomandi.
