,,Svekkjandi, komum okkur aftur inn í leikinn þegar það eru fimm mínútur eftir og geta farið að skora þriðja markið,“ sagði Sverrir Ingi Ingason varnarmaður Íslands eftir 2-4 tap gegn Tyrkjum í Þjóðadeildinni í kvöld, svekkjandi úrslit.

Íslenska liðið komst í 1-0 í leiknum og jafnaði svo í 2-2 þegar lítið var eftir en missti leikinn niður.

„Við fáum á okkur tvö mörk undir restina sem kostar okkur leikinn, það er erfitt að fá á sig fjögur mörk á heimavelli.“

Ísland fékk dæmt á sig tvær vítaspyrnur í leiknum þar sem VAR tæknin var notuð, Tyrkir skoruðu aðeins úr annari spyrnu sinni þar. Í fyrri spyrnunni fór Hakan Çalhanoğlu á punktinn eftir að boltinn fór í hendina á Sverri Inga. Hakan rann hins vegar á punktinum og sparkaði boltanum í vinstri fót sinn og þaðan í markið.

Dómari leiksins hafði því engan annan kost en að dæma markið af. Völlurinn í Laugardalnum er háll og það hafði líklega áhrif.

Íslendingar vildu fá vítaspyrnu eftir þetta en ekki var farið í skjáinn þegar augljóst var að boltinn fór í hönd Tyrkjans á línunni. Urðu margir Íslendingar reiðir út í pólska dómara leiksins.

„Í takti við leikinn þá er skrýtið að hann flauti ekki vítaspyrnu þegar Orri er að setja boltann í markið, það virðist á myndbandinu sem ég sá eftir leikinn. Hann gerir sig stærri og ver boltann, hann hafði dæmt tvö víti á okkur.“

„Hann flautaði víti í því atviki og þegar boltinn fer í höndina á Andra, skrýtið að hann flauti ekki víti okkur í hag.“