Sólveig Anna Jónsdóttir, formaður verkalýðsfélagsins Eflingar, er allt annað en kát með fréttaflutning Vísis af gjaldþroti veitingahússins Ítalíu. Í umfjöllun miðilsins í vikulok fékk Elvar Ingimarsson, eigandi staðarins, að halda því óáreittur fram að það hefðu verið mótmælaaðgerðir Eflingar sem hefðu verið banabiti Ítalgests ehf., rekstrarfélags veitingastaðarins.
„Þegar gögnin koma upp á yfirborðið sem sýna hvernig þetta mál er búið að vera, þá sér það hver heilvita maður að þessi árás var gjörsamlega skot út í loftið. Og þessi aðför með ólíkindum,“ sagði Elvar í áðurnefndri umfjöllun.
Sé hins vegar auglýsingin um gjaldþrotið í Lögbirtingablaðinu skoðuð sést að frestsdagur er 5.september sem samkvæmt lögum telst vera „sá dagur sem héraðsdómara berst beiðni um heimild til greiðslustöðvunar eða til að leita nauðasamnings eða krafa um gjaldþrotaskipti,“
Mótmæli Eflingar fyrir framan veitingastaðinn hófust hins vegar ekki fyrr en 12. september, viku eftir að krafa um gjaldþrotaskipti leit dagsins ljós.
Eins og áður segir var Sólveig Anna ekki hrifinn af því að Elvar hafi fengið að halda fram þessum lygum og hún hæddist að fréttastofunni og skaut föstum skotum að Elvari i færslu á Facebook-síðu sinni.
„Vel gert, Vísir, litla krútt. Félög í Eigu Elvars Ingimarssona eru í vanskilum við skattinn upp á tæpar 50 milljónir. Vanskilin við lífeyrissjóðinn Gildi eru rúmar 12 milljónir. Til viðbótar ýmis önnur vanskil. En auðvitað eru það aðgerðir Eflingar sem orsökuðu gjaldþrotið. Skamm vonda Efling að koma í veg fyrir að heiðvirðir viðskiptamenn geri upp við skattinn og Gildi, það er ekki ofsögum sagt af illkvitni þinni og andstyggilegheitum.“