Stefán Teitur Þórðarson ræddi við 433.is í kvöld eftir leik við Wales á Laugardalsvelli en spilað var í Þjóðadeildinni.

Ísland lenti 2-0 undir gegn gestunum en tókst að koma til baka í seinni hálfleik og lokatölur 2-2 sem eru ágætis úrslit miðað við það sem komið var.

,,Ég horfi eiginlega meira á þetta svekktur eftir þennan seinni hálfleik sem við eigum við fáum færi eftir færi og það er ótrúlegt að við vinnum ekki,“ sagði Stefán.

,,Við pressum þá alveg niður til markmanns og þeir reyndu alltaf það sama og sama og það gekk ekkert og þeir enduðu alltaf á því að gefa á Moore frammi.“

,,Það er tvisvar eða þrisvar sem þeir koma inn á völlinn og við hleypum þeim inn sem við megum ekki gera og við stöndum of flatir allir. Þegar við missum þá úr pressunni megum við ekki vera flatir.“

Stefán fékk gult spjald í leiknum og verður í banni gegn Tyrkjum á mánudag en hann var ósáttur með liðsfélaga sinn Willum Þór Willumsson sem fékk að heyra það á meðan leik stóð.

,,Ég vissi ekki að ég væri í banni eftir tvö gul en það er ömurlegt. Ég sagði einhver góð orð, ég veit það ekki. Að þetta hafi ekki verið nógu gott en svona er að vera sexan.“