Age Hareide, landsliðsþjálfari Íslands, ræddi við RÚV í kvöld eftir leik okkar manna við Wales á Laugardalsvelli.

Leiknum lauk með 2-2 jafntefli en Ísland lenti 2-0 undir í fyrri hálfleik en tókst að jafna í þeim síðari.

Innkoma Loga Tómassonar spilaði stórt hlutverk en hann skoraði það fyrra og átti allan þátt í því seinna sem var sjálfsmark markvarðarins Danny Ward.

Age viðurkennir að frammistaðan hafi ekki verið góð í fyrri hálfleik en segir enn fremur að Ísland hafi átt að vinna leikinn að lokum.

,,Við erum mjög vonsviknir því við spiluðum ekki eins og við ætluðum að gera. Við gerðum skelfileg mistök í fyrri hálfleik sem eru ekki í boði á þessu stigi en svona hlutir gerast, við gerum öll mistök og þau eru hluti af leiknum,“ sagði Age við RÚV.

,,Það var erfitt að gera eitthvað í þessu á hliðarlínunni, það eina sem við gátum gert var að gera breytingar í hálfleik og koma liðinu aftur í gang. Við vorum bjartir í seinni hálfleik og hefðum átt að vinna leikinn.“

,,Vörnin var ekki upp á sitt besta en það getur gerst, ef varnarmaður gerir mistök þá getur það kostað heilan leik en ef sóknarmaður klikkar á færi þá skiptir það ekki öllu máli.“

,,Við gerðum breytingar og Logi var frábær, hann átti góðan dag en Kolbeinn átti kannski ekki sinn besta dag.“