Faðir 14 ára stúlku hefur fengið mikið hrós fyrir viðbrögð sín við því að níu ára drengur hafi verið í sífellu að sparka í sæti stúlkunnar í flugvél sem þau voru öll farþegar í. Stúlkan greindi frá málinu á Reddit þar sem föður hennar er mikið hrósað og hann sagður hafa „hefnt sín snilldarlega“, fyrir hönd dóttur sinnar, á drengnum.
Mirror greinir frá málinu.
Feðginin voru farþegar í flugvél sem var á leið frá Indlandi en ekki er tekið skýrt fram að þau hafi verið á leið til Bretlands. Lítið rými var á milli sæta í flugvélinni en um var að ræða næturflug. Stúlkan segir að vélin hafi verið á flugi í um 10 mínútur þegar drengurinn, sem sat í sætaröðinni fyrir aftan hana, byrjaði að sparka í sífellu í sætið hennar en hún hafi ólm viljað reyna að sofa sem hafi verið ómögulegt vegna þessara stanslausu sparka.
Drengurinn sat við hlið foreldra sinna. Stúlkan sagði föður sínum frá því hvað drengurinn var að gera. Faðirinn bað drenginn vinsamlegast um að hætta og hann hlýddi því í örskamma stund. Þegar drengurinn hélt spörkunum áfram varð tónn föður stúlkunnar hvassari en drengurinn ansaði því ekki. Brást þá faðir stúlkunnar við með því að halla sínu sæti aftur svo að fótarými drengsins minnkaði töluvert. Faðir drengsins bað hann um að lyfta sætinu sem hann neitaði að gera og var þá flugþjónn kallaður til.
Flugþjónn tók hins vegar afstöðu með föður stúlkunnar og sagði hann eiga fullan rétt á að halla sínu sæti aftur en stúlkan segir flugþjóninn hafa tekið vel eftir því hvernig drengurinn lét. Hann hafi gengið í burtu undir bölvi og ragni föður drengsins. Foreldrar drengsins hafi loks fengið hann til að hætta að sparka í sætið. Þau hafi hins vegar sent henni, föður hennar og flugþjóninum illt augnaráð. Stúlkan segir föður sinn hafa haft sæti sitt í hallandi stöðu í klukkutíma í viðbót þar til hann hafi verið viss um að drengurinn og foreldrar hans hefðu lært sína lexíu.
Í athugasemdum við færsluna fær faðir stúlkunnar mikið hrós fyrir viðbrögð sín. Í einni athugasemd er meðal annars bent á að ekki sé hægt að ná til sumra fyrr en eitthvað hafi bein áhrif á þá sjálfa.
