Gylfi Þór Sigurðsson er að ná bata eftir meiðsli í baki sem urðu til þess að hann missti af tveimur leikjum með Val fyrir landsleikjafríið.

Gylfi hefur náð að taka þátt í öllum æfingum íslenska landsliðsins í vikunni og gæti spilað gegn Wales á morgun.

„Hann hefur æft með okkur, svo sjáum við á morgun,“ segir Age Hareide landsliðsþjálfari Íslands.

Gylfi byrjaði báða landsleiki Íslands í september og því verður að teljast líklegt að hann byrji á morgun sé hann heill heilsu.

Gylfi hefur átt í vandræðum með eymsli í baki í sumar sem hafa orðið til þess að hann hefur misst af nokkrum leikjum með Val.