Íbúar á Flórída búa sig nú undir „storm aldarinnar“ en fellibylurinn Milton mun væntanlega ná landi á vesturströnd Flórída í kvöld. Vísindamenn og almannavarnir hafa hvatt fólk á þeim svæðum sem óttast er að verði verst úti til að yfirgefa heimili sín, ella eiga hreinlega á hættu að deyja.

Milljónir íbúa hafa þegar brugðist við og var umferðaröngþveiti víða á þjóðvegum Flórída í gær þar sem fólk freistaði þess að koma sér í skjól.

Í Bandaríkjunum er fellibyljum skipt í fimm flokka eftir styrkleika þeirra. Í 1. stigs fellibyl er þrýstingur í auga hans yfir 980 millibör og lítil hætta á miklu tjóni. Hættan á tjóni fer svo stighækkandi eftir því sem þrýstingurinn minnkar.

Í 5. stigs fellibyl er þrýstingurinn kominn undir 920 millibör og hættan á stórtjóni mikil. Það er nefnilega ekki bara vindhraði sem hefur áhrif því oft fylgja fellibyljum mikil sjávarflóð og gæti sjávarstaðan á ákveðnum svæðum, til dæmis í nágrenni Tampa, hækkað um fleiri metra.

New York Post segir frá því að myndband sem Weather Channel birti fyrst árið 2013 hafi vakið töluverða athygli nú í aðdraganda yfirvofandi fellibyls. Í umfjölluninni var sýnt á grafískan hátt hvers má vænta í fellibyljum af mismunandi styrkleika. Ef fer sem horfir og Milton gengur yfir Flórída sem 5. stigs fellibylur má vænta þess að tjón verði mjög mikið.

Í öðru myndbandi frá 2018 sem einnig hefur vakið athygli síðustu daga varpar Weather Channel ljósi á þau sjávarflóð sem geta fylgt fellibyljum. Myndbandið var unnið þegar fellibylurinn Florence gekk yfir Norður- og Suður Karólínu árið 2018.

Í umfjöllun New York Post kemur fram að Milton gæti orðið það öflugur að þörf sé á að endurskoða kerfið sem flokkar styrkleika fellibylja. Jafnvel sé þörf á að koma á 6. stiginu.