„Móðir Kolfinnu hefur upplifað það að kerfið hafi ekki staðið sig sem skyldi og vildi koma þeirri gagnrýni mjög skýrt á framfæri; að geðheilbrigðiskerfið væri ekki að taka á móti fólki eins og það þyrfti,“
segir Arna Ýrr Sigurðardóttir, sóknarprestur í Guðríðarkirkju.
Í gær birti Arna Ýrr hluta minningarorða Ingibjargar Dagnýjar Ingadóttur, móðir Kolfinnu Eldeyjar, sem ráðinn var bani fyrir tæpum mánuði. Kolfinna Eldey var jarðsungin í gær frá Grafarvogskirkju. Faðir hennar, Sigurður Fannar Þórsson, situr í gæsluvarðhaldi, grunaður um að hafa orðið henni að bana.
Í viðtali við RÚV í kvöldfréttum nú í kvöld segist Arna Ýrr hafa sömu reynslu í sínu starfi.
„Ég upplifi það mjög sterkt að það aukist mjög vanlíðan fólks, og að fólk fái ekki alltaf þá þjónustu sem það þarf á að halda. Og við þurfum virkilega að fara að íhuga það að breyta forgangsröðuninni í samfélaginu okkar. Ójöfnuðurinn er að aukast, misskiptingin er að aukast, sálfræðiþjónusta er gríðarlega dýr, það eru langir biðlistar í alla þjónustu.“
Segir hún að grípa þurfi einstaklinga áður en kemur í óefni.
„Ég hef upplifað alltof mörg dæmi um að fólk sé búið að grátbiðja um hjálp í geðheilbrigðiskerfinu og gefst bara upp og það gerist eitthvað hræðilegt. Ég hef komið að því að jarðsyngja ungar manneskjur sem hafa tekið líf sitt eftir að hafaverið sendar heim af geðheilbrigðisstofnun. Ég veit um fólk sem er á biðlistum þangað til það er aðframkomið.“
Hlusta má á viðtalið við Örnu Ýr í heild sinni í kvöldfréttum RÚV.
Ef einstaklingar glíma við sjálfsvígshugsanir er bent á Hjálparsíma Rauða krossins 1717 og netspjall Rauða krossins 1717.is. Opið allan sólarhringinn. Einnig má hafa samband við Píeta-samtökin sem veita ókeypis ráðgjöf í síma 552-2218, allan sólarhringinn. Netspjall Heilsuveru þar sem svarar hjúkrunarfræðingur er líka opið frá kl.8-22 alla daga. Fyrir þau sem misst hafa ástvin í sjálfsvígi má fá stuðning í sorg hjá Sorgarmiðstöð og hjá Pieta samtökunum.
