Það eru mikil læti í kringum írska landsliðið og talsverð pressa er byrjuð að fara á Heimi Hallgrímsson sem er nýlega tekin við þjálfun liðsins.

Heimir tapaði fyrstu tveimur leikjum sínum í starfi en liðið mætir Finnlandi á föstudag í Þjóðadeildinni og Grikklandi á mánudag.

Richard Dunne fyrrum varnarmaður írska landsliðsins telur að Heimir gæti hreinlega misst starfið sitt ef illa fer í þessum leikjum.

Írska þjóðin er afar kröfuhörð og eftir mörg erfið ár vill fólkið fara að sjá árangur strax, þolinmæðin er lítil. „Ég held að Heimir sé byrjaður að finna pressuna í starfinu,“ segir Dunne í samtali við írska miðla.

Heimir sagði upp sem landsliðsþjálfari Jamaíka til að taka við starfinu. „Hann fær kannski smá slaka því írska sambandið var lengi að ráða þjálfari. Ef liðið vinnur ekki annan leikinn núna þá tel ég samt líkur á að það verði skoðað að skipta um þjálfara,“ sagði Dunne einnig en hann átti farsælan feril á Englandi og lék með Manchester City, Aston Villa og fleiri liðum.

Dunne segir verkefnið fyrir Heimi vera að búa til lið sem þjóðin geti verið stolt af.

„Hann þarf að búa til lið sem þjóðin sameinast í kringum. Við lítum ekki út fyrir að vera lið, hann þarf að sjá til þess að það sé eining í hópnum. Þetta eru mjög mikilvægir leikir fyrir Heimi.“

Dunne telur að aðstoðarmaður Heimis vilji starfið en John O´Shea fyrrum varnarmaður Manchester United er þar í starfi. „Ég væri hissa ef O´Shea myndi ekki vilja fá starfið en hann þekkir það eftir að hafa stýrt liðinu tímabundið.“