Dpa fréttastofan hefur eftir talsmanni slóvakísku lögreglunnar að maðurinn hafi verið við sveppatínslu norðan við bæinn Hybe þegar brúnbjörninn réðst á hann og veitti honum lífshættulega áverka.
Maðurinn var staddur utan alfaraleiðar og því var þyrla send á vettvang með bráðatækna sem sigu niður úr henni til mannsins. En þeim tókst ekki að bjarga lífi hans. Björninn hafði slitið stórar slagæðar í líkamanum í sundur og af hlutust alvarlegar blæðingar og síðan hjartastopp.
Í vor var mikil leit gerð að birni nærri bænum Liptovský Mikulas eftir að hann slasaði fimm manns. Dögum saman voru íbúar bæjarins beðnir um að halda sig innan bæjarmarkanna. Að lokum fannst björninn og var felldur.
Um 1.300 bjarndýr eru í Slóvakíu og hafast þau aðallega við í fjalllendi og þéttum skógum.
Það hefur færst í aukana á síðustu árum að birnir hætti sér nær byggð. Á síðasta ári voru 20 árásir bjarndýra á fólk skráðar í landinu en 2021 voru þær 8.
