Markvörðurinn Jökull Andrésson var gestur þeirra Helga Fannars Sigurðssonar og Hrafnkels Freys Ágústssonar í Íþróttavikunni þennan föstudaginn, en þátturinn kemur út á 433.is vikulega.

KR var tekið fyrir í þættinum en með liðinu spilar bróðir Jökuls, Axel Óskar Andrésson. Hann kom heim úr atvinnumennsku í vetur en gengi Vesturbæinga á leiktíðinni hefur verið langt undir væntingum.

„Ég ætla að reyna að tala um þetta án þess að gráta,“ sagði Jökull um KR.

„Ég hafði aldrei fylgst með KR en eftir að Axel kom þangað er ég orðinn harðasti KR-ingur á jörðinni. Þegar tímabilið er eins og hjá þeim núna, þetta er svo erfitt. Maður veit sem markmaður hvernig tilfinning það er að fá svona mörg mörk á sig og bróðir minn er varnarmaður.“

Axel, sem og aðrir stórir póstar í liði KR, hafa hlotið töluverða gagnrýni á leiktíðinni.

„Ég ætla ekki að ljúga því, þetta hefur verið erfitt. En Axel er búinn til úr steinum. Þetta er ekki gæi sem þú fokkar í. Hann er búinn að fá mikinn hita, sem ég held að atvinnumenn fái almennt meira af. En hann verður milljón sinnum betri leikmaður eftir þetta og andlega betri. Þetta er eitthvað sem þú lærir af,“ sagði Jökull.