Luis Enrique er svo sannarlega harðhaus en hann sannaði það í nýrri heimildarmynd sem var sýnd nýlega.

Enrique er þjálfari Paris Saint-Germain en hann vann með stórstjörnunni Kylian Mbappe á síðustu leiktíð áður en sá síðarnefndi fór til Real Madrid.

Enrique ræddi við Mbappe í einrúmi en hann var ósáttur með framlag leikmannsins þegar kom að varnarvinnu og pressu.

Spánverjinn heimtaði meira frá stórstjörnunni og að hann myndi gefa allt í sölurnar áður en hann tæki skrefið til Real í sumar.

,,Ég hef lesið það að þú sért hrifinn af Michael Jordan. Michael Jordan hefði gripið um eistu liðsfélaga sinna og varist eins og brjálæðingur,“ sagði Enrique.

,,Þú þarft að setja fordæmi bæði sem leikmaður og manneskja. Þú ert framúrskarandi og heimsklassa leikmaður, það efast enginn um það en það er ekki nógu gott fyrir mig.“

,,Alvöru leiðtogi er einhver sem hjálpar á öllum sviðum þó það sé ekki að skora mörk. Það er það sem ég vil frá þér sem leiðtoga.“

,,Við eigum tvo leiki eftir og ég vil að þú farir héðan án þess að sjá eftir einhverju sem gerðist á vellinum.“