„Það hefði pottþétt verið betra að byrja í ræktinni, hlaupa, spara, pæla í lífeyrisréttindum eða fjárfesta í sér fyrir mjög mörgum árum en það er ekki hægt að spá í því. Sá tími er liðinn og dagurinn í dag því sá allra besti til að hlúa að sér og varða leiðina inn í framtíðina í leik og starfi,“ segir Andrea Róbertsdóttir framkvæmdastjóri Félags kvenna í atvinnulífinu eftir stefnumótunarfund sem haldinn var í Íslandsbanka.

,,Þetta er lífið sem mig langar í“ var yfirskrift á fundinum þar sem félagskonur komu saman til að ræða FKA-lífið sem þeim langar í. „Við erum félagið, eigum allar erindi og héldum fund til að móta starfið og félagið okkar í takt við nýja tíma,“ segir Unnur Elva Arnardóttir formaður FKA sem hvetur allar félagskonur að taka þátt í að móta starfið og láta til sín taka.

Samnefnari sem við erum sáttar við

Una Steins framkvæmdastjóri viðskiptabankasviðs Íslandsbanka var með öflugt erindi og stefnumótunar- og gildavinnu var stýrt af Ragnheiði Aradóttur PCC stjórnendamarkþjálfa, ráðgjafa og eiganda PROcoaching og PROtraining.

„Núverandi stjórn félagsins vildi fullvissa sig um að við værum á réttri leið eftir stefnumótunardag sem haldinn var hjá Íslandsbanka haustið 2019 þar sem COVID skall á skömmu síðar. Stjórn þess tíma var heldur betur í stuði með aðgerðarlistana á lofti eftir daginn en fljótlega skall á heimsfaraldur. Þið munið hvernig þróunin varð – snertismit, metrarnir á milli fólks, hópsmit, hólf, ótti og óvissa sem breytti heimsmyndinni og því mikilvægt að staldra við og safna félagskonum saman til að halda áfram til að vera vissar um að við séum að vinna með samnefnara sem við erum sáttar við,“ segir Andrea.

Félagið á 25 ára afmæli í ár, starfsárið er komið á fullt og konur eru hvattar til að skrá sig til leiks og taka þátt í Félagi kvenna í atvinnulífinu, FKA. 

„Besti dagurinn er í dag munið þið,“ segir Andrea glöð í bragði.