Trump lét þessi orð falla eftir að Íranir gerðu eldflaugaárásir á Ísraelsmenn í gær, en eins og greint hefur verið frá hafa Ísraelsmenn hótað því að hefna fyrir árásirnar í gær. Hafa olíuvinnslustöðvar Írana einkum verið nefndar í því samhengi.
Trump var ómyrkur í máli þegar hann ræddi stöðuna og sagði að skærur Írana og Ísraelsmanna minntu einna helst á slagsmál á milli barna á skólalóð.
Hann gagnrýndi varaforsetann og forsetaframbjóðanda Demókrata, Kamölu Harris, harðlega og sagði að hvorki hún né Joe Biden væru starfi sínu vaxin.
„Ég hef lengi talað um að þriðja heimsstyrjöldin sé yfirvofandi,“ sagði Trump og bætti vð að hann vildi ekki spá fyrir um það hvort þriðja heimsstyrjöldin væri að hefjast. Spádómar hans ættu það nefnilega til að rætast. „Við ætlum ekki að spá fyrir um þetta en við erum nálægt algjörri katastrófu.“
„Forsetinn okkar gerir ekkert og varaforsetinn, sem ætti að vera við völd, gerir það ekki heldur. Það veit enginn hvað er í gangi – hún var á fjáröflunarsamkomu í San Francisco,“ bætti Trump við á blaðamannafundi sem hann hélt í Milwaukee í gær.
Trump minnti svo á að þegar hann var forseti Bandaríkjanna hafi friður ríkt í Mið-Austurlöndum og Íran haldið sig á mottunni. Þá hafi friður ríkt í Evrópu og í Afganistan. Nú sé öldin hins vegar önnur enda utanríkisstefna Bandaríkjanna verið veik í forsetatíð Joe Biden.
