Schumacher var haldið sofandi í fleiri mánuði eftir slysið og hafa einu upplýsingarnar um heilsu hans komið í véfréttarstíl frá hans allra nánustu. Engar myndir hafa birst af honum og hann hefur ekki sést opinberlega frá slysinu. Þá hefur verið fullyrt að aðeins örfáar manneskjur, eiginkona hans þar á meðal, hafi aðgang að honum og geti umgengist hann.
Þetta kann þó að vera að breytast ef marka má umfjöllun sem birtist á vef Mail Online í gær.
Schumacher nefnilega sagður hafa sést opinberlega í fyrsta sinn frá slysinu þegar hann var viðstaddur brúðkaup dóttur sinnar um liðna helgi. Hin 27 ára Gina Schumacher gekk þá í hjónaband með sínum heittelskaða, Iain Bethke, í glæsivillu Schumacher-fjölskyldunnar á Mallorca.
Í umfjölluninni kemur fram að stórfjölskyldan og vinir hjónanna hafi verið viðstaddir brúðkaupið. Samkvæmt heimildum var þó passað upp á friðhelgi fjölskyldunnar því gestum var gert að skilja símana sína eftir svo engar myndir lækju út. Mun þetta hafa verið í fyrsta sinn sem Michael Schumacher sést á opinberum vettvangi, eða því sem næst, frá slysinu 2013.
Talið er að Michael Schumacher dvelji að mestu með eiginkonu sinni á Mallorca og á heimili þeirra við Genfarvatn í Sviss.
