Keir Starmer, forsætisráðherra Bretlands, var í símasambandi við Netanjahú í gær þegar Íranir hófu árásir sínar. Hann segist hafa miklar áhyggjur af ástandinu og telur að Miðausturlönd séu á „brúninni“ og mjög lítið megi út af bregða til að allt fari í bál og brand.
Fréttir hafa nú borist af því að Ísraelsmenn hafi mögulega í hyggju að skjóta á olíuvinnslustöðvar í Íran til að hefna fyrir árásina í gær. Íran er eitt stærsta olíuríki heims og á gríðarlegra hagsmuna að gæta að olíuvinnsla verði ekki fyrir skakkaföllum.
Í umfjöllun Daily Mail er haft eftir Avi Melamed, fyrrverandi leyniþjónustumanni í Ísrael, að árásir Írana í gær þýði bara eitt: Ísraelsmenn muni hefna fyrir árásina og þær verði mun meiri að umfangi en hefndarárásirnar í apríl þegar Íranir gerðu drónaaárásir á Ísrael.
Mohammad Bagheri, hátt settur aðili í íranska byltingavarðliðinu, sagði í morgun að Íranir væru að sama skapi tilbúnir og hugsanlegum hefndaraðgerðum Ísraelsmanna yrði mætt af fullum þunga. Íranski herinn væri bæði tilbúinn að verjast og sækja.
„Ef Evrópu eða Bandaríkjunum tekst ekki að halda aftur af síonistastjórninni, sem gengin er af göflunum, þá verða aðgerðir kvöldsins endurteknar en í miklu stærri mæli þar sem allir innviðir Ísraels eru undir,“ sagði Bagheri. Abbas Araghchi, utanríkisráðherra Írans, hefur einnig hvatt Bandaríkjamenn til að skipta sér ekki af átökunum.
Bandaríkjamenn hafa stutt dyggilega við bakið á Ísraelsmönnum og munu halda því áfram, samkvæmt yfirlýsingu Jake Sullivan, þjóðaröryggisráðgjafa Hvíta hússins. „Við höfum talað skýrt um það að það verða afleiðingar af þessari árás, miklar afleiðingar, og við munum vinna með Ísraelsmönnum að því.“
Á sama tíma og allt er á suðupunkti á milli Íran og Ísraels, tveggja stórra hervelda, hafa Ísraelsmenn haldið aðgerðum sínum í Líbanon áfram. Markmið Ísraelshers er að uppræta Hezbollah-hreyfinguna sem Íranir styðja. Snemma í morgun bárust fréttir af eldflaugaárásum Ísraelshers á suðurhluta höfuðborgarinnar Beirut. Engar fregnir hafa borist af manntjóni en talið er að minnsta kosti eitt þúsund manns hafi látið lífið í Líbanon í árásum Ísraelshers síðastliðnar tvær vikur eða svo. Ísraelsher er ekki heldur búinn að gleyma Gaza-svæðinu en í frétt Mail Online kemur fram að 32 hafi látið lífið í árásum sem gerðar voru í Khan Younis í nótt.
