Manchester City mistókst að klára Newcastle í ensku úrvalsdeildinni eftir að hafa komist yfir í leiknum. Leikið var á heimavelli Newcastle.
Josko Gvardiol varnarmaður City skoraði glæsilegt mark í fyrri hálfleik og kom liðinu yfir.
Newcastle ógnaði með hraða sínum og krafti og Anthony Gordon slapp í gegn og féll til jarðar eftir viðskipti við Ederson markvörð City.
Snertingin var ekki mikil en vítaspyrna var dæmd og Gordon fór sjálfur á punktinn og skoraði.
Bæði lið reyndu að sækja sigurinn undir restina en það mistókst og lokastaðan því 1-1 jafntefli.