Gunnar Birgisson og Tómas Steindórsson voru gestir þeirra Helga Fannars Sigurðssonar og Hrafnkels Freys Ágústssonar í nýjasta þætti af Íþróttavikunni á 433.is.
Það var að sjálfsögðu rætt um toppbaráttuna í Bestu deild karla í þættinum en þar eru Blikar til alls líklegir. Gunnar telur að einn maður hafi þar mikið að segja.
„Innkoma Ísak Snæs, ég fer ekkert ofan af því að mér finnst hann vera besti leikmaðurinn í þessari deild,“ sagði hann, en Ísak kom á láni frá norska liðinu Rosenborg.
Í kjölfarið fóru af stað vangaveltur um framtíð Ísaks, sem á að snúa aftur til Noregs í vetur.
„Hann ákveður að fara ekki til baka úr láninu sínu (í sumar), þeir eru væntanlega ekkert allt of sáttir við það,“ sagði Helgi.
„Ég sé hann ekki spila aftur fyrir Rosenborg. Það er algjört gisk en eins og þú varst að koma inn á held ég að ef báður aðilar hefðu viljað láta þetta ganga upp þá hefðu þeir kallað hann til baka í sumar,“ sagði Gunnar þá.
Tómas tók í svipaðan streng.
„Hann var ekki keyptur sem einhver ungur og efnilegur leikmaður, hann var bara keyptur til að spila,“ sagði hann, áður en Gunnar tók til máls á ný.
„Mér finnst eins og honum líði best í Breiðablik. Hvað skiptir máli þegar ferlinum er lokið? Ég held það sé bara svo mikilvægt að líða vel. Eflaust fær hann einhver tilboð en tilfinningin núna er að hann verði áfram í Breiðablik, en þetta er bara gisk út í loftið.“
Umræðan í heild er í spilaranum.
Íþróttavikan er í boði Bola léttöl og Lengjunnar