Rafael van der Vaart, fyrrum leikmaður Tottenham, vonar innilega að hans fyrrum félag taki Evrópudeildina alvarlega í ár.
Það gerist reglulega að lið á Englandi hvíli leikmenn í Evrópudeild eða Sambandsdeild til að ná betri árangri í deild.
Van der Vaart þekkir það vel að spila í Evrópu en hann á að baki leiki fyrir lið eins og Real Madrid sem og auðvitað Tottenham.
Hollendingurinn segir að ensk lið taki Evrópudeildinni ekki alvarlega og að það sé skrítið viðhorf.
Tottenham vann Qarabag í Evrópudeildinni í gær 3-0 þrátt fyrir að vera manni færri frá áttundu mínútu.
,,Ég hef aldrei skilið þetta viðhorf liða á Englandi. Evrópudeildin er frábær. Þú þarft að berjast allt tímabilið til að fá sæti í keppninni,“ sagði Van der Vaart.
,,Það er langbest af öllu að spila í Evrópukeppnum sem leikmaður og ég vona innilega að þeir taki þessu alvarleg.“