Hermann Hreiðarsson lét mjög óvænt af störfum hjá ÍBV í dag nú þegar liðið er komið upp í Bestu deild karla. Hermann er fluttur frá Vestmannaeyjum ásamt fjölskyldu sinni.
Hermann hafði stýrt ÍBV í þrjú ár þegar hann ákvað að stíga til hliðar frá uppeldisfélaginu sínu.
„Við ákváðum fyrr í sumar að við vildum flytja upp á land, erum flutt. Svo var fókus á tímabilið og skoða stöðuna, ég sé það ekki ganga upp að búa í bænum með unga fjölskyldu. Mér þykir það vænt um klúbbinn minn að ég vil ekki gera þetta með hangandi hendi,“ segir Hermann í hlaðvarpinu Dr. Football.
„Við erum komin upp á land og maður skilur eftir klúbbinn á frábærum stað, ég hef átt frábært samstarf og það hefur gengið á ýmsu. Ég er þakklátur fyrir traustið frá A-Ö.“
Hermann lét stjórn ÍBV vita af þessu. „Það eru tveir daga síðan að ég segi að þetta gangi ekki upp, það yrðu árekstrar og maður yrði alltaf að tosa sig í aðra hvora áttina.“
Hermann vill ólmur halda áfram að þjálfa. „Maður brennur fyrir þetta, þetta er rétt að byrja. Búin að ná stöðugleika síðustu ár,“ segir Hermann en hvert væri draumastarfið?
„United. Þessi maður (Erik ten Hag) veit ekkert, það er ekkert að frétta,“ sagði Hermann í léttum tón.
Hermann segist opin fyrir öllu en hann hefur öðlast mikla reynslu í þjálfun. „Ég er opin fyrir öllu, maður er búin að brenna fyrir þessa klúbba sem maður hefur verið hjá síðustu ár.“