Guðrún Hafsteinsdóttir, dómsmálaráðherra, er sá ráðherra sem flestum finnst hafa staðið sig best. Bjarni Benediktsson, forsætisráðherra, er langóvinsælasti ráðherrann.
Þetta kemur fram í nýrri könnun Maskínu þar sem spurt var um hvaða ráðherrar hefðu staðið sig best og verst á kjörtímabilinu.
7,3 prósent nefndu Guðrúnu Hafsteinsdóttur í könnuninni en aðeins 2 prósent að hún hefði staðið sig verst allra ráðherra.
Í öðrum sambærilegum könnunum hefur Katrín Jakobsdóttir, fyrrverandi forsætisráðherra, yfirleitt trónað á toppnum með nokkrum yfirburðum. Hún mælist aðeins með 7,1 prósent núna, sem skýrst hugsanlega af því að hún er horfin úr ríkisstjórninni.
7 prósent telja að Áslaug Arna Sigurbjörnsdóttir, háskóla-, iðnaðar- og nýsköpunarráðherra, hafi staðið sig best. 5,7 prósent Willum Þór Þórsson heilbrigðisráðherra, 4,6 prósent Svandís Svavarsdóttir innviðaráðherra (áður matvælaráðherra), 4,6 prósent Jón Gunnarsson (áður dómsmálaráðherra), 4,2 prósent Ásmundur Einar Daðason mennta- og barnamálaráðherra, 3,8 prósent Bjarni Benediktsson forsætisráðherra (áður fjármálaráðherra og utanríkisráðherra), 3,5 prósent Lilja Alfreðsdóttir menningar- og viðskiptaráðherra, 3,1 prósent Þórdís Kolbrún R. Gylfadóttir utanríkisráðherra (áður fjármálaráðherra), 2,9 prósent Sigurður Ingi Jóhannsson fjármálaráðherra (áður innviðaráðherra), 2,8 prósent Guðlaugur Þ. Þórðarson umhverfis-, orku- og loftslagsmálaráðherra, 1,5 prósent Guðmundur Ingi Guðbrandsson félags og vinnumarkaðsráðherra og aðeins 0,1 prósent Bjarkey Olsen Gunnarsdóttir matvælaráðherra.
Þegar kemur að óvinsælustu ráðherrunum trónir Bjarni á toppnum með 38,6 prósent. Í öðru sæti er Svandís með aðeins 10,1 prósent.
Þegar kemur að stjórnmálaskoðunum sést að kjósendur ríkisstjórnarflokkanna eru hrifnastir af formönnum sínum. Það er Framsóknarflokksins eru hrifnastir af Sigurði Inga, Sjálfstæðismenn af Bjarna og Vinstri græn af Katrínu.
Kjósendur Flokks fólksins eru hrifnastir af Willum Þór, Miðflokksmenn af Jóni Gunnarssyni, Píratar af Svandísi, Samfylkingarfólk og Sósíalistar af Katrínu og Viðreisnarfólk af Áslaugu Örnu.
Kjósendur allra flokka eru minnst hrifnir af Bjarna nema Sjálfstæðismenn. Þeir eru minnst hrifnir af Svandísi.
Könnunin var gerð 10. til 16. september. Svarendur voru 994.
