Vopnageymsla var vígð 2018 með pompi og prakt. Aðstoðarvarnarmálaráðherrann var viðstaddur og var mjög ánægður með bygginguna sem þótti mjög nútímaleg og átti að vera svo örugg að nánast ekkert gæti ógnað henni.
Hann sagði við þetta tækifæri að með tilkomu vopnageymslunnar væri hægt að koma í veg fyrir að ráðist væri á flugskeyti og skotfæri og þess utan væri geymslan sprengiheld og gæti nánast ekki brunnið. Að hans sögn uppfyllti hún hæstu öryggisstaðla á heimsvísu.
Hún er um fimm kílómetrar á lengd og hálfur annar kílómetri á breidd og er um 200 km austan við lettnesku landamærin. Þetta er, eða kannski var, ein stærsta vopnageymslan í Rússlandi.
Snemma á miðvikudagsmorguninn reis stórt sveppalaga eldhaf upp úr geymslunni og þrýstibylgjur brutu rúður í húsum í nágrenninu. Að mati ráðgjafa úkraínsku ríkisstjórnarinnar svaraði sprengingin til þess að 1,3 til 1,8 kílótonn af TNT hafi sprungið en það svarar til aflsins í lítilli kjarnorkusprengju.
Sprengingin mældist 2,8 á Richter á jarðskjálftamælum og gervihnattarmyndir sýndu reykský sem þakti rúmlega sex ferkílómetra svæði.
Rússnesk yfirvöld segja að sprenginguna megi rekja til þess að loftvarnarsveitir hafi skotið dróna niður yfir svæðinu og hafi brak úr honum valdið eldi sem slökkviliðsmenn hafi reynt að ná tökum á. Sögðu yfirvöld að slökkvistarfið hafi verið svo erfitt að flytja hafi þurft hluta íbúa Toropets á brott en þar búa um 11.000 manns.
Heimildarmenn innan úkraínsku leyniþjónustunnar segja að mikill fjöldi úkraínskra dróna hafi hæft geymsluna sem er um 460 kílómetra frá úkraínsku landamærunum.
Úkraínski miðillinn RBC segir að 100 drónar hafi gert árás á geymsluna samtímis.
Myndbandsupptökur frá Toropets staðfesta að drónar komu við sögu því bæði heyrast greinileg drónahljóð og þeir sjást fljúga yfir húsin í bænum.
Á öðrum upptökum heyrist einnig hljóð í flugskeyti eða álíka hlut á sama tíma og árásin stóð yfir. Þetta gæti bent til að Úkraínumenn hafi notað vestræn flugskeyti til árása á vopnageymsluna.
Jótlandspósturinn segir að það geti einnig verið önnur skýring á þessu hljóði. Úkraínumenn gætu hafa notað nýja tegund hraðfleygra dróna sem eru með þotuhreyfil í árásinni.
Volodymyr Zelenskyy, forseti Úkraínu, skýrði frá því í lok ágúst að Úkraínumenn hefðu þróað prófað nýja tegund langdrægra dróna, með þotuhreyfla. Dróninn hefur fengið nafnið Palianytsia.
Ísraelskur hernaðarsérfræðingur birti upptökur af því sem er að sögn tilraunaflug drónans. Hann segir að hann geti borið 50 kg af sprengiefni og náð allt að 500 kílómetra hraða á klukkustund og dregið um 500 kílómetra.
Þetta er mun meiri hraði og meira drægi en hefðbundnir drónar búa yfir. Ísraelski sérfræðingurinn segir að svona drónar geti þó tæplega eyðilegt steyptar vopnageymslur.
