„Davíð og Moggamenn hafa ekki enn þá séð ástæðu til að biðjast afsökunar á ærumeiðingum sínum. Enda djúpt á sómakenndinni þar á bæ.“ skrifar Ólafur Arnarson í nýjum Náttfarapistli á Hringbraut.
Ólafur segir að í heilan mánuði hafi verið beðið eftir því að Davíð Oddsson og Morgunblaðið biðji Dag B. Eggertsson, fyrrverandi borgarstjóra, afsökunar á ásökunum og ávirðingum sem Davíð hafi staðið fyrir þar sem Dagur hefur verið ásakaður um óeðlilega töku orlofsfjár við starfslok „þar sem meiðyrði hafa ekki verið spöruð, eins og t.d. í leiðara Morgunblaðsins þann 19. ágúst sl. þar sem var spurt: Er sjálftakan ásættanleg að mati Samfylkingar? Í öðrum leiðara þann 22. ágúst notaði Davíð orðin „yfirgengilega orlofssugan“ um Dag B. Eggertsson.“
Ólafur rifjar einnig upp að laugardaginn 17. ágúst voru fjórir dálkar á forsíðu blaðsins lagðir undir risafyrirsögnina ORLOFSFÉ DAGS EINSDÆMI. Í Náttfarapistlinum fer Ólafur yfir það að því fer fjarri að uppgjör borgarinnar á orlofsdögum Dags hafi verið eitthvert einsdæmi, eins og Morgunblaðið hefur haldið fram:
„En veruleikinn er annar. Þann 31. ágúst birti Vísir vandaða samantekt á staðreyndum málsins sem unnin var upp úr bókhaldi borgarinnar. Þá kom á daginn að veruleikinn er aldeilis annar en að Dagur hafi misnotað aðstöðu sína við umrætt uppgjör. Sá sem sem fær að birtum staðreyndum málsins höggið beint í andlitið er enginn annar en Davíð Oddsson, fyrrum borgarstjóri og sá sem ber ábyrgð á rógskrifum og ærumeiðingum Morgunblaðsins vegna þessa máls, því sjálfur fékk hann uppgerða fleiri orlofsdaga þegar hann lét af embætti borgarstjóra en Dagur fékk núna. Davíð fékk uppgerða 93 orlofsdaga árið 1991 en Dagur fékk 69 daga uppgerða þegar hann lét af embætti borgarstjóra á þessu ári.“
Í svari borgarinnar til Vísis kemur m.a. fram að sá sem fékk langflesta orlofsdaga uppgerða miðað við starfstíma var Markús Örn Antonsson, sem tók við sem borgarstjóri af Davíð Oddssyni árið 1991. Hann gegndi stöðu borgarstjóra í 2,7 ár en fékk við starfslok uppgerða 90 orlofsdaga – eða 33 orlofsdaga á ári að meðaltali. Sá borgarstjóri sem fékk næstflesta daga uppgerða að meðaltali fyrir hvert starfsár var Hanna Birna Kristjánsdóttir frá Sjálfstæðisflokki. Hún gegndi stöðu borgarstjóra í 1,8 ár en fékk 41 orlofsdag uppgerðan við starfslok – eða 23 orlofsdaga að meðaltali á ári.
Ólafur bendir á að Davíð fékk mun fleiri orlofsdaga uppgerða en Dagur B. Eggertsson, þrátt fyrir að hafa setið skemur í embætti. Þá rifjar hann upp að þetta fyrirkomulag greiðslu ótekins orlofs var einmitt tekið upp í borgarstjóratíð Davíðs.
“Í ljósi þessara staðreynda hefði Davíð Oddsson átt að undirbúa árásir Morgunblaðsins betur þegar hann taldi að loksins hefðu þeir fundið höggstað á Degi B. Eggertssyni sem hefur átt sinn stóra þátt í að halda Sjálfstæðisflokknum frá völdum í Reykjavík um árabil. Hátt var reitt til höggs en höggið kom beint í andlit Sjálfstæðisflokksins og Davíðs sjálfs.“
Ólafur skrifar að ef einhverjir fyrrverandi borgarstjórar verðskuldi uppnefnið „orlofssugur“ þá sé þá helst að finna í Sjálfstæðisflokknum.
Náttfarapistilinn í heild má lesa hér.
