Bandaríski tónlistarmaðurinn Sean „Diddy“ Combs gæti átt þungan fangelsisdóm yfir höfði sér vegna gruns um mansal og skipulagða glæpastarfsemi. Rapparinn var handtekinn í New York á mánudag eftir að niðurstaða ákærudómstóls lá fyrir. Fyrr á þessu ári gerði bandaríska alríkislögreglan, FBI, allsherjar leit á heimilum hans og áður hafði fyrrverandi kærasta hans, Cassandra Venture, stigið fram og sakað hann um ítrekuð kynferðisbrot og ofbeldi.
Sjá einnig: Skuggaleg hegðun Sean Combs:Margra daga orgíur, barnaolía í lítravís og vökvi í æð
Málið hefur vakið mikinn óhug og eru margir að skoða gömul myndbönd af rapparanum og öðrum tengdum honum. Klippa úr raunveruleikaþættinum The Apprentice árið 2012 hefur verið í dreifingu um netheima undanfarna daga en í henni segir fyrrverandi Bandaríkjaforsetinn Donald Trump að hann telji Diddy vera góðan náunga þegar keppandi vildi ekki svara spurningu um rapparann.
„Ég er mjög ströng og einbeitt athafnakona, því að vinna fyrir Diddy í sex ár þjálfaði mig í að þurfa vera fullkomin,“ segir Aubrey O’Day, keppandi í fimmtu þáttaröð af The Apprentice.
„Að vinna fyrir Diddy?“ spurði þá Trump.
„Algjörlega,“ svaraði hún.
„Ég elska Diddy, þú veist. Hann er góður vinur minn. Hann er góður náungi, er hann góður náungi?“ spurði Trump.
„Ég vil ekki svara þeirri spurningu,“ svaraði O’Day.
„Vá, mér finnst hann vera góður náungi. Ég ætla að standa með honum,“ sagði Trump.
Horfðu á samtalið hér fyrir neðan.
@foodandstuff420 Trumpers will still say Diddy & Trump weren’t friends. 😂 #voteblue2024💙 #vote #trump #maga #magacult #cult45 #seancombs #puffy #news ♬ original sound – Food&Stuff
Aubrey O’Day er bandarísk söngkona og raunveruleikastjarna sem kom fyrst fram á sjónarsviðið sem meðlimur af stelpusveitinni Danity Kane, sem Diddy stjórnaði. Hún var rekin úr hópnum árið 2008 og greindi frá því árið 2022 að það hafi verið vegna þess að hún hafi ekki viljað gera ákveðna hluti fyrir Diddy eða taka þátt í ákveðnum athöfnum, sem tengdust á engan hátt tónlistinni eða bransanum.
