Ef áformin ná fram að ganga, munu allir þeir sem hafa lokið lagaprófi geta boðið sig fram til dómaraembættis en kosið verður í embættin.
Þessar róttæku breytingar ná yfir öll dómstig landsins, allt frá forseta hæstaréttar niður til héraðsdómara.
López Obrador, forseti, segir að þetta sé eina leiðin til að útrýma hinni miklu spillingu sem einkenni dómskerfið. Gagnrýnendur telja að nýja fyrirkomulagið með að láta almenning kjósa dómara, sé ógn við lýðræðið í landinu.
Frumvarpið um þetta var samþykkt með auknum meirihluta á þingi landsins í síðustu viku eftir að æstir andstæðingar þess höfðu ráðist inn í þinghúsið.
Nú þurfa ríki landsins að staðfesta lögin en það er líklega formsatriði eitt því Morena-bandalagið, sem Obrador forseti fer fyrir, vann stórsigur í kosningunum í júní.
Hann lætur þó af embætti 1. október því hann mátti ekki bjóða sig fram á nýjan leik. Claudia Sheinbaum tekur við forsetaembættinu þá og verður fyrsta konan til að gegna því. Hún styður nýju lögin.
Í nýjustu samantekt samtakanna Transparency International vermir Mexíkó 126. sætið á listanum yfir spilltustu lönd heims.
Orbrado kynnti breytingarnar á síðasta ári eftir að hæstiréttur hafði komið í veg fyrir sumar af pólitískum aðgerðum hans, til dæmis hvað varðar stækkun kjörstjórnar landsins. Sumir sérfræðingar telja að Orbrado sé að hefna sín á hæstarétti með því að reka alla dómara landsins úr embætti.
Pólitískir andstæðingar hans telja ekki að spilling sé raunverulega ástæðan fyrir breytingunum. Hin raunverulega ástæða sé að forsetinn og Morena-bandalagið séu að reyna að styrkja völd sín með því að gera dómskerfið pólitískt.