„Eitthvað sem mig óraði ekki fyrir þegar ég byrjaði að selja fisk til landsmanna árið 1989, þá átján ára gamall,“ segir Kristján á Facebook-síðu sinni og bætir við að hann hafi bara ætlað sér að reka fiskverslun í tvö ár, klára að verða kokkur á kokkasamningi hjá Hótel Óðinsvéum og verða svo meistarakokkur.
„Ég hef starfað við þetta síðan og verða árin orðin 35, þann 12 mars næstkomandi.
Margt hefur gengið á, sigrar og töp. En ég hef alltaf verið glaður í vinnunni minni. Mér finnst þetta starf vera líflegt og skemmtilegt. Reyndar svolítið sérstakt, þar sem starf fisksala er oft á tíðum erfitt. Langir vinnudagar. Fiskur er þungur, blautur og kaldur,“ segir hann og nefnir í framhjáhlaupi að stundum sé lyktin vond.
Kristján segist vera ánægðastur með hvað honum hefur tekist að halda á góðu starfsfólki – það sé lykillinn að velgengni fyrirtækis hans.
„Ég hef alltaf borið virðingu fyrir mínu starfsfólki, greitt mannsæmandi laun og talað við mitt fólk.
Það kemur ýmislegt upp. Fólk slasast, fer í frí, veikist, eignast börn, giftir sig og svo framvegis.
Þetta eru hlutir sem atvinnurekandi þarf að taka tillit til og vera á tánum með gagnvart sínu starfsfólki,“ segir hann og nefnir að hann hafi haft eina ófrávíkjanlega reglu fyrir sig og sitt starfsfólk.
„Hér er reglan: Ef þú treystir þér ekki til þess að borða þetta sjálfur, þá skaltu ekki selja vöruna eða bera hana fram. Hentu henni frekar,“ segir Kristján meðal annars í færslunni sem má lesa í heild sinni hér að neðan.
