Veitingastaðurinn Skál sem verið hefur á Hlemmi mathöll í nokkurn tíma hefur nú flutt í  nýtt framtíðarheimili að Njálsgötu 1 í miðbæ Reykjavíkur.

Skál var stofnað af þremur vinum Birni Steinari, Gísla Matt og Gísla Grímssyni en nú hefur bæst í eigendahópinn yfirkokkurinn Thomas Lorentzen og veitingastjórinn Jonathan Sadler.

Veitingastaðurinn hefur hlotið titilinn „Best goddamn restaurant in Reykjavík“ frá tímaritinu RVK Grapevine árin 2020, 2022, 2023 og 2024, eins og segir í tilkynningu.

„Við leggjum mikla ástríðu í matinn þar sem við leitumst eftir að finna besta hráefni sem við getum fengið hér og búum til rétti með frumlega nálgun á íslenskt hráefni en að sama skapi afar fallega og bragðgóða rétti. Maturinn er leiddur af yfirkokki okkar og nýjum meðeiganda Thomas Lorentzen sem hefur gríðarlega reynslu frá Kaupmannahöfn.

Þjónustan og vínseðillinn er leiddur af Jonathan Sadler þar sem aðaláhersla er lögð á vönduð náttúruvín sem við flytjum inn sjálfir frá frábæru víngerðarfólki víðs vegar í Evrópu og svo erum við einnig mjög stoltir að vera með einn besta barþjón landsins Hrafnkel Inga sem hefur unnið til ótal verðlauna fyrir störf sín í faginu á sínum langa ferli.

Ég tala fyrir okkur alla þegar ég segi að við erum ótrúlega spenntir fyrir því að vera komin á okkar framtíðarheimili hér á Njálsgötu 1. Við viljum halda áfram þeirra frábæru stemningu sem við náðum að byggja upp á Hlemmi Mathöll en spýta í og gera það enn betur, okkar hönnun alfarið. Nú er hægt að bóka borð en við höldum alltaf nokkrum borðum sem ekki er hægt að bóka, þannig fólk getur alltaf komið við hjá okkur,“ segir Gísli Matt.