Í vikunni var greint frá því að yfirvöld í Norður-Kóreu væru nú að vinna að því að endurskipuleggja stefnu sína þegar kemur að kjarnorkuvopnum. Sagði leiðtoginn að markmiðið væri að margfalda fjölda þeirra kjarnorkuvopna sem landið hefur yfir að ráða.
Hinn venjulegi leikmaður, ef svo má segja, áttar sig kannski ekki á því sem sést á myndunum hér að ofan. Einræðisherrann er þó augljóslega staddur í einhvers konar verksmiðju og sést ræða við starfsmenn við hlið lífvarða sinna.
Ástralski fjölmiðillinn News.com.au bendir þó á að myndirnar séu teknar í verksmiðju þar sem fram fer auðgun úrans. Þetta megi sjá á þeim tólum og tækjum sem sjást á myndunum.
Ekki liggur fyrir hvar eða hvenær myndirnar voru teknar en sérfræðingar eru á einu máli um að birting þeirra sé engin tilviljun. Þær eigi að sýna að Norður-Kóreumönnum sé fúlasta alvarlega þegar kemur að umræðunni um kjarnavopn.
Talið er að Norður-Kóreumenn starfræki minnst tvær verksmiðjur þar sem unnið er að auðgun úrans með skilvindum eins og sjást á myndunum hér að ofan. Önnur þeirra er sögð vera í Yongbyon og hin í Kangson, en báðir staðirnir eru stutt frá höfuðborginni Pyongyang.
Í frétt AP er haft eftir sérfræðingi að í umræddri verksmiðju sem sést á myndunum hér að ofan séu að líkindum um þúsund skilvindur, en þær duga til að framleiða um 20 til 25 kíló af auðguðu úrani á ári. Það er um það bil það magn sem þarf í eina kjarnorkusprengju.
