Fyrrum landsliðsmaðurinn Emil Hallfreðsson var gestur þeirra Helga Fannars Sigurðssonar og Hrafnkels Freys Ágústssonar í nýjasta þætti Íþróttavikunnar á 433.is, en þættirnir koma út vikulega í mynd og á hlaðvarpsveitum.

Það var að sjálfsögðu rætt um karlalandsliðið í fótbolta í þættinum, en Emil á að baki 73 A-landsleiki og fór á bæði EM 2016 og HM 2018 sem leikmaður.

Strákarnir okkar hófu leik í nýrri Þjóðadeild á dögunum með 2-0 sigri á Svartfjallalandi og 3-1 tapi gegn Tyrkjum. Emil var heilt yfir sáttur með verkefnið.

„Ég fór á leikinn á móti Svartfellingum og fannst hann nokkuð sannfærandi. Það var gaman að sjá Gylfa og Jóa Berg bakka upp þessa yngri sem eru að stíga upp og að verða alvöru leikmenn,“ sagði Emil meðal annars.

„Seinni leikurinn er erfiðari. Þú ert búinn að eyða orku í að taka 90 mínútur í fyrri og svo ferðu í ferðalag til Tyrklands og þeir eru með þrusugott lið.“

Emil telur íslenska liðið á góðri leið undir stjórn Age Hareide, sem tók við sumarið 2023.

„Ég held að þetta lið sé að komast á mjög góðan stað. Það verður fróðlegt að fylgjast með leikjunum í október, hvort við höldum ekki áfram að taka stig þar og byggjum ofan á þetta.“

Umræðan um landsliðið er í heild í spilaranum.