Þetta segir Vilhjálmur í samtali við Morgunblaðið í dag en tilefnið er nýtt fjárlagafrumvarp fyrir næsta ár. Gert er ráð fyrir að ríkissjóður verði rekinn með 41 milljarðs króna halla á næsta ári samanborið við 57 milljarða króna halla í ár.
Vilhjálmur segir það ekki ganga til lengdar að ríkissjóður sé rekinn með halla ár eftir ár. Eðlilegt sé að stjórnvöld reyni að gæta aðhalds og koma í veg fyrir hvernig báknið hefur blásið út.
Vilhjálmur gagnrýnir sérstaklega þá ákvörðun að ekki megi lengur ráðstafa séreignarsparnaði inn á húsnæðislán. Tíu ár eru liðin síðan fólk gat byrjað að nýta sér séreignarsparnað sinn til að lækka höfuðstól húsnæðislána og hefur stór hópur fólks notið góðs af því. En ekki er gert ráð fyrir því í nýju fjárlagafrumvarpi fyrir næsta ár og mun heimildin aðeins gilda fyrir fyrstu kaupendur.
„Þetta hefur reynst millitekjufólki gríðarlega vel við að lækka höfuðstólinn og fjölmargir hafa nýtt sér þetta. Og mér finnst það dapurt að þeir skuli hafa ákveðið að hætta með þetta,“ segir hann við Morgunblaðið og hvetur um leið stjórnvöld til að endurskoða ákvörðunina.
