Hilmar Bragi Jónsson matreiðslumeistari lést í morgun, 81 árs að aldri. Hilmar var búsettur síðastliðin ár í Torrevieja á Spáni.  

Sonur Hilmars, Jón Kári, greindi frá andláti föðurs sína á Facebook og birti Veitingageirinn.is tilkynningu um andlát Hilmars. Þar segir að þær fréttir hafi borist að „einn af okkar dáðustu matreiðslumeisturum væri látinn. Hilmar hafði legið á spítala frá 3. ágúst vegna sýkingar í hjarta, tengt hjartaaðgerð sem hann fór í fyrir um 25 árum. Lyfin virtust vera að virka en hjartað hefur gefið sig.“

Hilmar var einn þekktasti matreiðslumaður landsins og á vef Veitingageirans er ævintýralegur ferill hans rakinn úr áður birtri grein þegar Hilmar varð áttræður. Hilmar var matreiðslumeistari Vigdísar Finnbogadóttur meðan hún gegndi embætti forseta Íslands. Hann sá um allar opinberar veislur fyrir Vigdísi og fór með henni í ferðalög út fyrir landsteinana. Hilmar stofnaði einnig Matreiðsluskólann og var í fyrsta kokkalandsliðinu sem keppti fyrir Íslands hönd á alþjóðavettvangi.

Hilmar var fæddur á Ísafirði 25. október 1942. Eiginkona hans, Elín Káradóttir, var ráðskona á Bessastöðum, en hún veiktist og lést fyrir nokkrum árum. Áttu þau tvö börn.