Þó að Bandaríkin séu vagga tækniframfara og snjalltæknin komi mikið til þaðan eru þau þó mjög aftarlega á merinni sem samfélag, þegar kemur að því að hagnýta alla þessa tækni. Gróskan er utan Bandaríkjanna og raunar utan vesturlanda. Asía og rómanska Ameríka eru á fullri ferð og innviðir víða í Asíu taka innviðum vesturlanda langt fram. Eiríkur Bergmann er gestur Ólafs Arnarsonar í hlaðvarpi Eyjunnar.

Hlusta má á brot úr þættinum hér:

Eyjan - Eirikur Bergmann 5.mp4

„Fótspor vesturlanda minnkar. Ég hef átt því láni að fagna að vera boðinn hingað og þangað, hef verið að þvælast dálítið í rómönsku Ameríku, og maður sér bara veröldina vera að rísa einhvern veginn alls staðar, allt í kringum vesturlönd. Mér finnst vesturlönd stundum vera eins og roskin hjón sem eru ein eftir í allt of stóru einbýlishúsi, börnin eru flutt að heiman, og þau óttast umhverfi sitt. Þau eru farin að loka sig af og þekkja ekki lengur umhverfið. Eina sem þau gera er bara að styrkja þjófavörnina hjá sér,“ segir Eiríkur.

Hann segir mikla grósku eiga sér stað annars staðar í heiminum. „Asía, hvernig Asía hefur verið að rísa; að koma í borgir Asíu – Bandaríkin eru eins og föst í níunda áratugnum samanborið við þróaðar borgir Asíu. Það er allt að grotna niður í innviðum, lestarkerfið er ónýtt, vegirnir og allt, hvernig fólk ferðast um. Þessi þróun er annars staðar en á vesturlöndum,“ segir Eiríkur.

Bandaríkin held ég að sitji aftar á merinni en Evrópa.

„Já, og maður finnur það í Bandaríkjunum, eins og það er nú gaman að þvælast þarna um, þá finnst mér alltaf eins og ég sé í bíómynd frá 1985 eða eitthvað svoleiðis. Jæja, nú er ég kannski aðeins farinn að bulla, má það ekki alveg í þessum þætti hjá þér?“

Þú ert ekki sá fyrsti.

„En svona blasir þetta stundum við manni, þetta er eitt af því sem rennur um hugann.“

Já, Bandaríkin, þetta mikla tæknisamfélag, tæknifyrirtækin eru gjarnan bandarísk, þetta er svona það sem er fremst í heiminum, en Bandaríkin sem samfélag, í Bandaríkjunum borga menn enn þá rafmagnsreikninginn með því að skrifa tékka og senda hann í pósti.

„Einmitt, það er margt einhvern veginn svona. En svo gengur maður um Palo Alto og Kísildalinn, og allt þetta dót sem ég er með hérna í Apple símanum mínum og allt þetta dót, þetta kemur allt meira og minna frá Bandaríkjunum.“

Hægt er að hlusta á hlaðvarpið í heild sinni hér: