Það var heldur betur tækifæri til að fagna kraftinum sem býr í íslenskum konum á opnunarviðburði FKA, félags kvenna í atvinnulífinu, sem fór fram hjá Carbfix fimmtudaginn 5. september. FKA kynnti með stolti þátttöku Höllu Tómasdóttur, forseta Íslands, og Dr. Eddu Sifjar Pind Aradóttur, framkvæmdastýru Carbfix á stórglæsilegum viðburði og viðbrögðin létu ekki á sér standa. Konur fylltu nokkrar rútur til að sameinast og njóta stundarinnar með Höllu og Eddu Sif. Konum gafst einstakt tækifæri á að kíkja í eitt af holutopphúsum Carbfix, þar sem CO2 er breytt í stein og hefur prýtt forsíðu National Geographic.
„Hjálmur og vesti er hinn besti djammgalli,“ segir Unnur Elva Arnardóttir formaður FKA glöð í bragði eftir viðburðinn. „Halla Tómasdóttir forseti Íslands var heiðursgestur á Opnunarviðburði FKA hjá Carbfix, Edda Sif sem hefur hlotið fjölda innlendra og alþjóðlegra viðurkenninga fyrir leiðandi starf sitt á sviði loftslagsmála og sem brautryðjandi fyrir konur í vísindum. Þetta var því einstök stund sem við upplifðum.“
„Dr. Edda Sifjar Pind Aradóttir, framkvæmdastýra Carbfix hlaut hvatningarviðurkenningu FKA 2022 og þá veitti hún viðurkenningunni viðtöku á fjarfundi, á tölvuskjá í sjónvarpsþætti sem við sendum út vegna heimsfaraldurs. Viðurkenningarhátíð FKA sem vanalega er viðburður sem vekur gríðarlega athygli þar sem framlína íslensks atvinnulífs sameinast var sjónvarpsþáttur vegna COVID. Time-tímaritið valdi Eddu Sif eina af áhrifamestu manneskjum í heiminum á sviði loftslagsmála og þannig mætti áfram telja. Þá voru hún og Halla Tómasdóttir, forseti Íslands, saman á topplista Reuters „List of 20 Trailblazing Women in Climate” á Alþjóðlegum baráttudegi kvenna. Það var því tryllt að ná þeim saman á svið. Einstakt náttúrulega að búa á landi þar sem þú hittir forsetann í sundi – en það er nákvæmlega samfélagið sem við viljum búa í,“ segir Andrea Róbertsdóttir framkvæmdastjóri FKA.
Rútuferðir voru farnar frá Húsi atvinnulífsins á meðan nokkrar konur komu sér sjálfar á svæðið. „Ein rúta fylltist, svo önnur og þriðja enda spennandi dagskrá og verið að telja í stórglæsilegan viðburð þökk sé Carbfix og Coca-Cola á Íslandi sem er aðalstyrktaraðili FKA á 25 ára afmælisári félagsins sem stendur yfir. FKA færði svo Höllu og Eddu Sif jakka og pils úr íslenskri ull úr smiðju Röggu Gísla söngkonu og listagyðju fyrir Icewear. Afrakstur vöruþróunar á íslenskri ull sem hefur vakið mikla athygli. Þá voru konum gefnir rauðir sokkar með vísun í Rauðsokkur sem hafa heldur betur haft áhrif á líf okkar og skrifað konur inn í söguna.“
Tæknin felur í sér að blanda koldíoxíði (CO2) við vatn og dæla því í hentug jarðlög þar sem náttúrulegu ferli er flýtt við að breyta CO2 í steindir sem eru bundnar varanlega. Þannig leggjum við okkar að mörkum gegn neikvæðum loftslagsbreytingum með því að neita sömu aðferðum og náttúran sjálf. Markmið og tilgangur Carbfix er skýr, að hafa raunveruleg jákvæð áhrif á loftslag með öruggum og sönnuðum aðferðum við að binda CO₂ í stein með því að útvíkka tæknina á heimsvísu.
Því er samtalið um loftslagsmál gríðarlega mikilvægt þegar við mótum framtíðina fyrir okkur öll. Það skiptir máli að ræða lausnir, þróa þær og leita leiða til að innleiða þær. Við þurfum öll að horfa inn á við, takast á við þann umhverfissóða sem býr í sumum okkar, og krefjast þess að kerfisbundnar breytingar verði til hins betra. Það er í okkar höndum að gæta að þessari einu jörð og tryggja að komandi kynslóðir erfi góðan og gefandi stað.
